لساني دا أسوي معاهو شنو؟

[عزيز عيسى]

وقت كنت صغير كان راسي قوي خلاص.. وزي الحجر.. وما بسمع الكلام أبدا.. متل ما يقولوا أخوانا المصريين (راسي ناشفة).. لكن الحسنة الوحيدة فيني كنت بسمع كلام الناس الكبار وبس.. يعني الناس الصغار والقدري في العمر كنت حاقر بيهم جنس حقارة أكان أولاد ولا بنات كنت بصهين منهم.. ومكجنهم.. وكان جني وجن حاجة إسمها مذاكرة.. أو واحد يقوم يرسلني محل.. بعتبرها حقارة.. وزي ما قلت كنت حقار لكن ما برضى الحقارة..حتى لو كان المرسال في صالحي برضو ما بمشي.. بس كدا كيتا علي الناس.. وكان ركبت راسي.. مخي بيقفل وما بعرف إتصرف تاني وما برجع في كلامي كلو كلو.. ومش لو حنسوني.. لو قعدوا لي في الواطة برضو ما بمشي.. يعني ما بمشي غتاتة بس.. وفي البيت كنت بسمع كلام أبوي وأخوي الكبير.. لأنو الأثنين ديل كنت بخاف منهم خوف شديد وبحترمهم.. أخوي الكبير دا كنت بلاوز منو.. وكان جينا للجد بخاف منو شديد.. وبحاول دائما إتفاداهو.. زول خطري خلاص..
وفي واحدة مرا كبيرة جارتنا كان بتخوفني بالموس.. وعليها جنس غتاتة بس خليها ساكت.. أصلو ما لاقاتني زي غتاتها دى.. دايما تلقاها شايله الموس في محفضتها عشاني.. تقول موصنها علي.. وياما إتمنيت الموس دي تجرحها كيتا عليها وتنتقم لي منها.. كلما تسمع إني عملت غلبة تقول لي بطهرك بيها.. برضو بعمل ليها ألف حساب.. لأني خايف من الطهورة.. في مرة من المرات أختي الكبيرة شافتني بلعب كثير.. طول اليوم جاري في الرماضة الحارة حفيان.. وأغالط في أولاد الفريق.. قالت لي يا ولد إنت أبوك وأخوك مش كلموك تبطل اللعب وتذاكر دروسك؟.. أحسن ليك تسمع الكلام.. طنشتها ليك جنس تطنش واحد لمان زعلت مني.. ولا اشتغلت ليك بيها الشغلة وإستمريت في لعبي.

أختي الكبيرة قالت لي: تعال النرسلك السوق تجيب رغيبف.. هي عارفاني مكجن القراية والمرسال بي الله واحد.. وكمان راسي قوي.. تقوم تجي وتقول لي النرسلك.. لما كترت معاي قمت قلت ليها لا بقرأ ولا عايز أمشي السوق.. قدر ما حنستني أمشي السوق أو أقوم أشيل كتبي وأذاكر ركبت راسي طب وقلت ليها ما عايز أذاكر يعني ما عايز أذاكر.. ولا حتى عايز إترسل.. ختيتو ليها قرض وقلت ليها ما تكتري معاي.. واللي عايزه تسويهو سوي.. يعني حقارة وقلة أدب مني عديل ما عايزه ليها إتنين ثلاثة..
أختي الكبيرة دي صبورة لدرجة بعيدة.. حاولت معاي كذا مرة.. علا أنا استمريت في قوة راسي.. وأبيت أسمع الكلام حسادة ساكت.. وعملت فيها الولد مقددها وشفت وما في حد يقدر علي.. وبيني وبينكم الوقت داك كنت ضعيفوني ورشيق.. واحدة من أخواتي كانت غتيتة جنس غتاتة.. قامت سمتني أبعصيبات.. وناس الحي كانوا شايلين حالي.. كل مرة ينادوني أبعصيبات.. لكنهم ماجيبين خبر ساكت.. كان عندي عضيلات زي التبش.. وبخوف وليدات وبنات الفريق كلهم واحد واحد..

[عزيز عيسى]

نرجع لموضوعنا.. أختي حاولت معاي كل السبل.. لكن في النهاية زهجت.. وأبيت أمشي أذاكر.. هي زاتها سكتت وخلتني.. وقالت لي شوف ليك واحد يجي يحجزك الليلة من الضرب.. هي عارفه بيحصل شنو لما أبوي وأخوي يجوا راجعين من الشغل.. باقيلكم متعود دايما مجلود.. لكن اليوم داك قلت اتراجل شوية ونشوف أخرتها.. ولما شفت أختي صهينت.. أنا ذاتي صهينت وقلت موضوع القراية دا خلاص فكوني منو.. رفعت يديني في السما وقلت الحمد لله.. بعد ما لعبت كويس.. وشفت نفسي تعبت مشيت الصالون.. ومددت رجليني خارج السرير لأنهن مغبشات.. قلت أحسن ما أوسخ الفرشة.. وأخدت لي رقدة نمت في أمان الله مبسوط.. وموضوع المرسال والقراية زاتو طلع لي من بالي.
لما جات العصرية.. أبوي و أخوي الكبير جو راجعين من الشغل.. زهجانين وقافله معاهم.. بمجرد ما دخلوا الجماعة ديل البيت.. أول شيء قاموا سألوا عني.. تقول طالبني غبينه.. قام أبوي سأل أختي الكبيرة قاليها: أخوك وين؟.. اختي قالت لأبوي وبدون مقدمات الولد دا كلمتو يذاكر.. رفض يسمع كلامي.. اليوم كلو مشغول مع اللعب..

وقدر ما حنستو يذاكر رفض لي عدييل.. عليكم الله في غتاتة أكثر من كدا.. هسع أختي دي مش قاصداني.. بدور تجيب لي في المشاكل.. وفعلا جابت لي الهواء.. وهي عارفة الناس ديل يادوب جايين من الشغل تعبانين قافله معاهم وزهجانين.. يعني عايزاهم يفشوا زعل الشغل فيني أنا المسكين الغلبان..

أخوي الكبير لما سمع الكلام دا بس شالتو الغبينة.. وأخوي دا لمان يزعل أخير منو زعلة أبوي.. يمكن زعلة أبوي فيها حنية شوية.. لكن الزول دا غتيت غتاته أصلو ما شفت زيها.. ودايما يدو ماكلاهو.. بسبب وبدون سبب عايز يتفشي فيني ويجلدني بأي طريقة.. ولما تقفل معاهو اخير منو راسي أنا القوي.. خلاص تاني ما بسمع كلام أي واحد يتكلم معاهو.. هسع زول زي دا عليكم الله يتحلوا منو كيف؟

هدوم شغلو حتى ما بدلن.. طوالي مشي يفتش علي ويطلعني من جوه الأرض.. لقاني ليك مكرفس كرعيني راقد في السرير زي أبو الثعالب نائم في الصالون.. وبحلم في أمان الله في حلمة سعيدة.. ومن شدة ما كنت مبسوط .. وعايش مع أحلام زلوط السعيدة كنت مكشر سنيناتي.. مرتاح وفرحان.. أخوي لما شافني مكشر سنيناتي وإتبسم زعل مني زعل شديد.. وقام أداني ليك لكزة كده في راسي الغليد العامل زي الدومة دا.. وسمعتو يقول لي: قوم يا زفت إنت.. كمان نايم وتتبسم؟

صحيت من نومتي الجميلة مخلوع.. أهضرب متل المجنون الضاربو سلك عريان.. ولا الزول الجاهو أبكباس في النوم.. قلت ليهو في شنو؟.. واتذكرت إني سمعت كلمة يا زفت لكن ما كنت متأكد منو الزفت دا.. حركت راسي يمين وشمال أشوف منو الزفت دا.. قام قال لي: إنت يا زفت إنت.. الكلام بعد داك يا دوب وقع لي.. أتاري الزفت دا أنا عرفت قاصديني بيها أنا.. عاد أسوي شنو.. قبلتها ولساني يمطق وأبلغ في ريقي.. قال لي: مالك ما عايز تذاكر دروسك.. أو تترسل ؟ إنت ناسي الامتحانات قربت؟.. بطرف نخريني.. وأنا لسه نعسان: قلت ليهو أنا فتران.. يا ريت لو الكلمة دي ما طلعت من خشمي.. وباقي لساني دا دايما موقعني في مصايب زي التقول ما حقي.. دا غير النضمي الكثير.. كلمة فتران دي رسلها لساني لخشمي وخشمي فكاها.. ندمت على اليوم الخلاني أقولها.. يعني لو لساني ما إتسرع وقال للزول دا أي كلمة تانية كان أحسن.. بس علا لساني دا مصر يوديني في داهية.. والبقيظني لما يجوا يدقوني خشمي يقعد يكورك.. ويطلب النجدة.. عينك ما تشوف إلا العجب.. النارية إنطلقت في أخوي الكبير.. وأشوف ليك الزول جاء طاير ناحيتي.. أنا قلت الزول دا فاكنو بي نبلة.. ولا إنقلب عصار وعايز يدمرني.. ما أشعر ليك إلا والزول يقوم يمسكني من رقبتي وكتفي زي الماسك كورة بلياردو.. ويروح طاقشني ليك بالحيطة.. وبقيت أشوف حاجات كدا إثنين إثنين.. وشيء زي النجوم بالنهار.. وشي زي السواسيو الطايرة حول راسي.. وحاجات تانية ما قدرت أفرزها.. غايتو بعد ما طقشت الحيطة عقلي الكان طاير رجع لصوابو..

.

[عزيز عيسى]

لما صدمت الحيطة.. خشمي كان بيكب في الدم.. وبعد شوية قعد أكورك.. ويطلب النجدة من أبوي وأمي.. لعل وعسى يجوا يحلوني من المصيبة الوقعت فيها.. وأختي بهناك سمعتها قالت كلمة واحدة: الليلة سجم أمك وسكتت.. لكن أنا ما كنت مبسوط لأنو الصدمة جات في خشمي.. بس كنت عايزها للساني الفقري دا الجايب لي المصايب.. لأنو دايما نضام ولغلاغ وبحب يقيظني ويضحك علي ويفرج علي خلق الله.. لكن في الوقت داك أبوي وأمي وحتى أختي الكبيرة عملوا أضان الحامل طرشا.. ما سامعين خالص.. يعاينوا ويسمعوا في خشمي يكورك.. وأنا يدقوا فيني زي الكلب السعران السارق عضمة من الجزار.. ما في ولا واحد حن علي يتدخل يفكي من مصيبتي.. لأنهم كلهم عارفني راسي قوي وما بسمع الكلام.. وعايزني أتأدب.. لكن كنت في اللحظة ديك عايز يطقشوني بالحيطة مرة تانية.. علشان أفتح خشمي وإنتقم من لساني الجايب لي المشاكل دا كيتا عليه.

وفي أثناء ما أنا راقد في الواطة وأكورك.. مرات كدا برفع راسي وأعاين بقعر عيني.. أقول يجي واحد من ناس البيت يحجزني من الزول دا والكسر والمصيبة الوقعت فيها.. لكن كلهم ما إهتموا بالموضوع.. تغابوا فيني العرفة.. وعملوا نفسهم مشغولين.. ولا حتى شافوني قبل كدا.. لما شفت الجماعة مصهينين.. قلت استنجد بأخوي الصغير يمكن يحلني.. لكن هو ذاتو عمل نايم.. ومشى في طريقه.. حركته دي أغاظتني وزعلتني جنس زعل.. أكثر من زعلتي على أخوي الكبير وهو بجلد فيني.. قمت قلت لأخوي الصغير ولسه بدقوا فيني.. المرة الجاية لما تعمل ليك شكلة مع واحد أوعك تجي تشكي لي.. وتطلب مني أساعدك.. وبرضو خشمي في الوقت داك كان بيكورك.. وأطلب في النجدة.. إنزنقت زنقة الكديس في الشرك.. في البيت جلد وفي المدرسة جلد يعني الواحد يسوى شنو؟ الله غالب.

المهم في النهاية جاتني فكرة جهنمية.. عملت فيها غمران.. لكن ما عارف هل الفكرة نجحت ولا أخوي الكبير يدو تعبت من الجلد وفجأ وقف الكسر.. أخدت لي شوية نفس وفتحت عويناتي.. افتكرت الزول دا خلاص خلاني ومشي.. لما فتحت عيوني.. لقيته ليك لسه واقف فوق راسي.. وقام نهرني وقال لي: تقوم تمشي السوق وتجي تذاكر ولا أواصل.. قمت تترب من الواطة بسرعة البرق.. وجريت مشيت السوق جبت المطلوب ولما رجعت خطفت شنطة الكتب.. وقلت ليه بكل أدب واحترام تاني بسمع الكلام..

[عزيز عيسى]

بدأت أذاكر.. ونسيت حكاية الجلد.. وشوية شوية عجبتني مسألة المذاكرة وإندمجت فيها.. لأنو قدرت أفهم حاجات ما كنت عارفها.. ولا حأفهما أبدا لو إستمريت في قوة راسي.. ساعدتني على النجاح في امتحان النقل النهائي..
أها من ديك بقيت أسمع الكلام.. وبطلت الحقارة ليوم الله.. وبقيت أمشي على أختي براي وبدون ما تسألني أو تطلب مني أقول ليها ما عايزه أجيب ليك حاجة من السوق بكل أدب واحترام.. ومرات أقوم أحلفها.. تقوم تقول لي مثلا عايزين سكر أو رغيف.. أقوم أقوليها خليني أمشي أجيب الأغراض دي قبل ما أبدأ المذاكرة.. خوف ساكت ما يقوموا يكسروني..

لم أعرف سر الجلد وفائدته إلا بعد أن كبرت ونجحت في مراحلي الدراسية.. وطبعا الجلد غير المبرح.. أو الذي يترك أثارا واضحة على الجسم.. الجلد من أجل التأديب.. وأخوي الكبير دا ما جلدني إلا من أجل مصلحتي ومستقبلي.. وأنا الآن بعتبر نفسي مدين له..

لما جيت إمريكا حذروني من جلد الأطفال.. قالوا لي لو هبشت الطفل ساكت ممكن يدخلوك السجن.. قلت ليهم طيب أخلص الجلد الجلدوني ليهو زمان دا في منو؟.. يعني حقي يكون راح ساكت.. لكن أبهاتنا وأخوانا حظهم شبعوا فينا جلد وأنحنا بعد ما تزوجنا وربنا رزقنا بالذرية طلعنا خسرانين وراح علينا الجلد.. وهسع يدي ماكلاني وعايز لي واحد جنى سوداني جاي جديد أقوم أديهو علقة وإتفشى فيهو.. قبل ما يعرف قانون البلد ويقوم يتصل بناس الحكومة يقبضوني ويدخلوني الحراسة.

مرات كدا بيني وبينكم الواحد بيكون متقريف واليومين ديل شايف نفسي خرمان للجلد.. هسع جسمي لما سمع كلمة جلد.. قامت فيه الكاروشة.. وعايز أرجع لأخوي الكبير عشان يجلدني.. والمثل بيقول الكلب بدور خنقو.. لكن خايف من لساني الطويل يقوم يغلط ويدخلني في مشكلة تاني ويفكني منها الحلا بله.

أها أكان عجبتكم قصتي دي تعالوا دقوني

[صالح ابوشوارب]

والله ياعزيز حنيت عليك .. لكن فعلا ناس ما بتجي الا بالضرب .. والعين الحمرا .. لكن يا عزيز شايفك اليومين ديل بتفتش في الكشة .. لكن نصيحتى ليك خليك ذى الخيلان الزنوج .. مما الواحد ايدو تاكلوا وروحو تحرقو بيقوم يمشى بيلعب ملاكمة ويتفشى في الناس .. شكرا حبيبنا للذكريات الجميلة

[نور العيون]

http://www.asmilies.com/smiliespic/gefts_m/Gif0405_004.gif (http://www.asmilies.com)


و الله يا اخ عزيز ممتنعه عن الكلام و ما عارفه أقول ليك شنو لكن العملتو ما ساهل و لو انا كنت في الوقت داك معاك كان خليت ليك البلد و طلعت و ما رجعت الا لمن تطلع منها نهائيا لكن ما عارفه هل انت عقلت حسي ولا لا.هاهاهاهاهاهاهاه

[شيخ الحارة]

والله يا ودالشيخ ضحكتني من جوا مصاريني والضحكني هو مكاجرتك دي
لاكن عليك امان الله انا اخير منك كنت برسل ومابذاكر
لاكن اخوك عجبني وده اللتربينا عليه فهل سيجد ابناء اليوم مثل اخوك ؟؟؟

وتسلم اخي موضوعك بدون مجاملة شيق ومضحك وهادف لمن يفهمه

[عزيز عيسى]

والله ياعزيز حنيت عليك .. لكن فعلا ناس ما بتجي الا بالضرب .. والعين الحمرا .. لكن يا عزيز شايفك اليومين ديل بتفتش في الكشة .. لكن نصيحتى ليك خليك ذى الخيلان الزنوج .. مما الواحد ايدو تاكلوا وروحو تحرقو بيقوم يمشى بيلعب ملاكمة ويتفشى في الناس .. شكرا حبيبنا للذكريات الجميلة
الحمدلله الحنيت علي يا صالح..
لكن عليك الله لو كنت مكان أخوي الكبير بي جنس (لماضتي) دي ما كان أديتني علقة ساخنة؟..
وفعلا الناس ما بتجي إلا بالضرب.. وضرب زمان ياما نجح ناس وخرج فطاحلة..
أقاربنا الزنوج ديل يازول ما بعرفوا الهظار.. شايلين طبنجاتهم في جيبوهم 24 ساعة في اليوم
الواحد زي ما قلت روحو محرقاهو.. تقوم تتكلم معاهو بيرد ليك بالطبنجة..
الطبنجة الما بعرفها (المسدس)..

[عزيز عيسى]

و الله يا اخ عزيز ممتنعه عن الكلام و ما عارفه أقول ليك شنو لكن العملتو ما ساهل و لو انا كنت في الوقت داك معاك كان خليت ليك البلد و طلعت و ما رجعت الا لمن تطلع منها نهائيا لكن ما عارفه هل انت عقلت حسي ولا لا.هاهاهاهاهاهاهاه
نورت يا نور العيون،

وسعدت جدا بمداخلتك..
ههههههه.. ذكرتيني أخواتي لما نزعلن.. بيقومون يقولن
والله الواحدة بعد ما تعرس ترتاح وتقطع وشها منكم..
نقوم نقول ليهن وراكن وراكن.. بنجي نزوركن..
يعني حتفوتن وين؟..
تصدقي ضرس العقل ذاتو ما تطلع لي لحد الآن..!!
وكان علي باقي سنيناتي.. زمان كنت بغلط لما تنكسر لي سن
بقوم أرميها ناحية الشمس وبقول:
يا شمس هاكي سن الغزال وأديني سن الحمار..
علشان كدا سنيناتي كبار ولما أنوم تلقيني مكشرن.

[عزيز عيسى]

والله يا ودالشيخ ضحكتني من جوا مصاريني والضحكني هو مكاجرتك دي
لاكن عليك امان الله انا اخير منك كنت برسل ومابذاكر
لاكن اخوك عجبني وده اللتربينا عليه فهل سيجد ابناء اليوم مثل اخوك ؟؟؟

وتسلم اخي موضوعك بدون مجاملة شيق ومضحك وهادف لمن يفهمه
حباب أخوي شيخ الحارة،

وزي ما بقول الكابلي:
الولادة بعد الشيخ كفا..

أهلا ومرحب بيك.. وسعدت جدا لحضورك وتعليقك الظريف..
وشكرا كثير على تفهمك للمغزى المقصود..
الجلد زمان فيه فائدة علمنا كيف نحترم الكبير والصغير..
ولو لا الجلد لما تعلمت الأجيال..
والزمن دا الناس بقت تجري وراء المعايش أكثر مما تتعلم..
وكل واحد في حاله.. الله يستر.

ولك مودتي وتقديري.

[شبندر]

لم أعرف سر الجلد وفائدته إلا بعد أن كبرت ونجحت في مراحلي الدراسية.. وطبعا الجلد غير المبرح.. أو الذي يترك أثارا واضحة على الجسم.. الجلد من أجل التأديب.. وأخوي الكبير دا ما جلدني إلا من أجل مصلحتي ومستقبلي.. وأنا الآن بعتبر نفسي مدين له..


الأخ عزيز لك التحية وحقيقه لم يعرف الشخص سر الجلد إلا في النهاية وفي فترة من الفترات كنت أستاذ لمادة الرياضيات والسبب خمسة جلدات من الأستاذ الجليل الأمين سنهوري أطال الله في عمره وكانت سبب لحبي لمادة الرياضيات أو في الحقيقة خوف من الأستاذ وكنت افخر بهذه الجلدات وكم مرة ذكرتها للطلاب وانا أستاذ

[Jamal Elmahi]

حليل زمن الجلد أأأخواجه...
أنا برضو كنت كاواي ولساني راميني في المشاكل...
كان لما الوالد عليه رحمة الله يجلدني أتحرق وقلبي يفور وأقول ليهو جلده بارده مويه ساي ...أقوم تاني يجلدني ويكون جسمي قام شرائط شرائط...
وتاني أقول ليهو بارده ولا حرقتني وانا مش حرقتني ساي قطعت قلبي...ولساني الخرابه دا ما داير يسكت ويريحني من الجلد...يقوم أبوي بي حرقه تاني يكسرني وأنا تاني أقول ليهو بارده ...وتجي الوالده الله يطوّل في عمرها تحجزني وأختي الصغيره محروقه عليّ وتقول لي أبوي عليك الله ماتدقو تاني دقني أنا وتكورك فيني أتا ماتقول بارده وانا دموعي ينقطو في الواطه وبرضو أقول بارده مويه ساكت...يقوم أبوي يقول للوالده الكبّه دا أسوّي ليهو شنو...جسمو دا لو جسم ورل كان حسّه يعني أخنقو أفطسو ولاّ أسوي ليهو شنو...ولساني شغال والله بارده مويه بس...والله يغفر لينا...
لكن حقيقةَ أتربينا بالجلد والله أحسن تربيه وربنا يرحم والدينا ميتين وحيين...
والغريبه ولدي أحمد مكنّش وليهو عصيبات طلع كاواي زيّ بالظبط كلما أجلدو يقول لي دقّني تاني ..أقول ليهو قديمه شوف غيرا...لانو بحب لعب الباسكت بول أقوم أحرمو أسبوع من اللعب...يتحرق ويقول لي دقني كل يوم لكن خليني ألعب...

ود الماحي

[sambaaa]

يا عزيز ..

انا الوحيد الفي بيتنا ما انجلدت كتير .. يعني نادر جداً يجلدوني . . جد والله العظيم
على عكس اخوي الاصغر مني كان شقي شقاوة شديدة وكل يوم بيجلدوه تلاتة مرات ..
الصباح علقة وبالنهار علقة وفي الليل وقت النوم كان برضو بيدوه علقة ..
لكن ولحكمة غريبة جدا .. أخوي الصغير ده ( محمد ) حاليا عكس تماما أيامه الكان صغير ..
الود هسه راجل فاهم وعاقل وهادئ جداً ..
بس انا البقيت شقي هسه على عكس ايام طفولتي ..

شكرا عزيز على الزكريات الجميلة ..

[الزبير محمد عبدالفضيل]

والله ياعزيز حنيت عليك .. لكن فعلا ناس ما بتجي الا بالضرب .. والعين الحمرا .. لكن يا عزيز شايفك اليومين ديل بتفتش في الكشة .. لكن نصيحتى ليك خليك ذى الخيلان الزنوج .. مما الواحد ايدو تاكلوا وروحو تحرقو بيقوم يمشى بيلعب ملاكمة ويتفشى في الناس .. شكرا حبيبنا للذكريات الجميلة
صراحه ذكريات ممتعه وترجع الواحد الي 20 سنه للوراء

[معتز حمدتو]

الغالي عزيز
والله شقاوتك كانت مبالغة ومنذ ان بدات في قراءة البوست وانا بضحك من اعماقي حتي دموعي سالت والمنام ابالي
لكن ظاهر عليك من كثرة الضرب اصبحت ( ليس بميت ايلامُ) مع احترامي لشخصك .
لكن ما اظن يوجد من هو احن علينا من الهلنا وتجد في لحظة صفو ان كل ذلك كان للمصلحة حتي وان عرته بعض الشدة .
بعدين يا سيدي ما في احلي من الاولاد خاصة جيل الفين الذي يستغرب الضرب . ( ربنا يخليك ذرتك وما يحوجك للشدة عليها )
تحياتي ليك مرة ثانية اخي عزيز مع دوام الذكريات المعطرة واللغة الدارجة التي اسعدتني ايما سعادة ذي التقول قاعد في حي النضيراب او الحلبة الذي كنا نعجز عن اللعب فيه لشقاوة او الفريق

[عزيز عيسى]

لم أعرف سر الجلد وفائدته إلا بعد أن كبرت ونجحت في مراحلي الدراسية.. وطبعا الجلد غير المبرح.. أو الذي يترك أثارا واضحة على الجسم.. الجلد من أجل التأديب.. وأخوي الكبير دا ما جلدني إلا من أجل مصلحتي ومستقبلي.. وأنا الآن بعتبر نفسي مدين له..


الأخ عزيز لك التحية وحقيقه لم يعرف الشخص سر الجلد إلا في النهاية وفي فترة من الفترات كنت أستاذ لمادة الرياضيات والسبب خمسة جلدات من الأستاذ الجليل الأمين سنهوري أطال الله في عمره وكانت سبب لحبي لمادة الرياضيات أو في الحقيقة خوف من الأستاذ وكنت افخر بهذه الجلدات وكم مرة ذكرتها للطلاب وانا أستاذ
الأخ الأستاذ شبندر،

أشكر لك روعة مرورك وحضوركم الباهي..
أستاذي الجليل مدثر أستاذ اللغة الأنجليزية في مدرسة شدو كان سببا رئيسا في حبي لمادة اللغة الأنجليزية..
وكذلك الأستاذ عبدالله الفكي الكامل أستاذ الرياضيات كان سببا في حبي لمادة الرياضيات..
منذ أن دخلت المدارس الثانوية العامة وتخرجت من الثانوية العليا كنت دائما أتفوق على جميع الطلبة في الحصول على
أعلى الدرجات في المادتين.. ولو لا الجلد لما حصلت على هذه الدرجات.. لهما التجلة والشكر والعرفان.
ودمت أخي بخير.

[عزيز عيسى]

حليل زمن الجلد أأأخواجه...
أنا برضو كنت كاواي ولساني راميني في المشاكل...
كان لما الوالد عليه رحمة الله يجلدني أتحرق وقلبي يفور وأقول ليهو جلده بارده مويه ساي ...
والغريبه ولدي أحمد مكنّش وليهو عصيبات طلع كاواي زيّ بالظبط كلما أجلدو يقول لي دقّني تاني ..أقول ليهو قديمه شوف غيرا...لانو بحب لعب الباسكت بول أقوم أحرمو أسبوع من اللعب...يتحرق ويقول لي دقني كل يوم لكن خليني ألعب...

ود الماحي
لكن يا جمال ضحكت لمن دموعي جرن..
المكاواة دي ذاتها ما كانت سبب علشان الواحد يجلدوا..
وكلمة باردة موية ساكت ومرات بقول هه ما حرقتني..
دي برضو كنت بقولها وبحرق بيها
روح البدقني من أهل البيت.. غايتو مرات لما ما أنجلد ليومين
تلاته بقوم استخدم أسلوب المكاواة علشان يجلدوني..
زي ما بقولوا أهلنا الجهل مصيبة فعلا..
أحمد دا هسع بقي زول عاقل وبتاع كرة سلة..
لكن المصيبة في ولدك عموري..
طالع كاواي.. الزول دا أصلو ما بفتر من الجري؟

[عزيز عيسى]

يا عزيز ..

انا الوحيد الفي بيتنا ما انجلدت كتير .. يعني نادر جداً يجلدوني . . جد والله العظيم
على عكس اخوي الاصغر مني كان شقي شقاوة شديدة وكل يوم بيجلدوه تلاتة مرات ..
الصباح علقة وبالنهار علقة وفي الليل وقت النوم كان برضو بيدوه علقة ..
لكن ولحكمة غريبة جدا .. أخوي الصغير ده ( محمد ) حاليا عكس تماما أيامه الكان صغير ..
الود هسه راجل فاهم وعاقل وهادئ جداً ..
بس انا البقيت شقي هسه على عكس ايام طفولتي ..

شكرا عزيز على الزكريات الجميلة ..
والله يا عثمان حظك.. الظاهر عليك إنت الكبير في أخوانك..
لكن صدقني لو كنت زي حالاتنا كدا وطلعت التاني ولا التالت
في أخوانك كان شبعت جلد وكسر تمام والدليل أخوك محمد الشقي
بيدوهو حبة في الصباح وحبة الضهرية وحبة قبل النوم
تقول صارفها ليه الدكتور.
ما تنسى تحكي لينا نوادر من أيام شقاوتك وذكريات أيام زمان.
لك مودتي.

[عزيز عيسى]

صراحه ذكريات ممتعه وترجع الواحد الي 20 سنه للوراء
سفيرنا سفير المنتدي يا زول يا رائع.. المتعة تكمن في في تواجدكم وحضوركم الجميل..
ذكريات زمان ما أجملها.. ويا ليت أيام الصبا تعود لكي نستمتع بالجلد..
احترامي وتقديري،

[عزيز عيسى]

الغالي عزيز
والله شقاوتك كانت مبالغة ومنذ ان بدات في قراءة البوست وانا بضحك من اعماقي حتي دموعي سالت والمنام ابالي
لكن ظاهر عليك من كثرة الضرب اصبحت ( ليس بميت ايلامُ) مع احترامي لشخصك .
لكن ما اظن يوجد من هو احن علينا من الهلنا وتجد في لحظة صفو ان كل ذلك كان للمصلحة حتي وان عرته بعض الشدة .
بعدين يا سيدي ما في احلي من الاولاد خاصة جيل الفين الذي يستغرب الضرب . ( ربنا يخليك ذرتك وما يحوجك للشدة عليها )
تحياتي ليك مرة ثانية اخي عزيز مع دوام الذكريات المعطرة واللغة الدارجة التي اسعدتني ايما سعادة ذي التقول قاعد في حي النضيراب او الحلبة الذي كنا نعجز عن اللعب فيه لشقاوة او الفريق
عزيزي الأخ نبيل،

السعادة الحقيقية في تواجدكم الزاهي.. فهي زاد لي لتذكر المزيد من الذكريات..
من شدة ما كان بيجلدوني مرات كدا بتجيني كاروشة عدييل..
وجسمي بتتفتح شهيته لما يجوا يجلدوني تاني..
يعني أخوك كان حمار جلد.. وزي ما قال عمك ودأبوشوارب
ناس ما بتجيش إلا بالضرب.. علشان كدا من كثرة الجلد
الواحد شوية شوية بقي يحس بالآلام وفي النهاية إستسلمنا للواقع
وتركنا المكاواة.
ياسلام عليك يا نبيل ذكرتني فريق الحلبة والعشير وأم سويقو؟
ربنا ما يحرمنا من روعة تواجدكم معنا.
لك مني أجمل تحية.

[114]

عزيز عيسى

سردك ممتع وشيق، والظاهر عليك وناااااااس

لكن أنا من أعداء الضرب، سواء في المدارس او في البيت

لا أحب انضرب ولا احب اضرب، وباعتبر الضرب علاج غير ناجع، وغالباً- إن لم يكن دائماً- يؤدي لنتائج عكسيه (ولو بعد حين) خاصة في نفسيات الإنسان..

ننتظر المزيد من ذكرياتك، وعلى فكرة يا عزيز انا اشتغلت استاذ في مدرسة شدو سنة 1975 لمدة ثلاثة اشهر هي الفترة الفاصلة بين ظهور نتيجة الشهادة السودانية والسفر للمغرب لدراسة الجامعة!!

[عزيز عيسى]

عزيز عيسى

سردك ممتع وشيق، والظاهر عليك وناااااااس

لكن أنا من أعداء الضرب، سواء في المدارس او في البيت

لا أحب انضرب ولا احب اضرب، وباعتبر الضرب علاج غير ناجع، وغالباً- إن لم يكن دائماً- يؤدي لنتائج عكسيه (ولو بعد حين) خاصة في نفسيات الإنسان..

ننتظر المزيد من ذكرياتك، وعلى فكرة يا عزيز انا اشتغلت استاذ في مدرسة شدو سنة 1975 لمدة ثلاثة اشهر هي الفترة الفاصلة بين ظهور نتيجة الشهادة السودانية والسفر للمغرب لدراسة الجامعة!!
الأخ الأستاذ عمر غلام الله،

تحايا من القلب،

الروعة والجمال في حضورك الزاهي الذي أضفى نكهة خاصة وزاد الموضوع جمالا وبعدا آخر..

طبعا الضرب أنواع.. الضرب المؤذي والضرب من أجل التأديب..
ففي رأي الضرب المؤذي هذا هو الذي يؤدي الى النتائج العكسية التي تفضلت بذكرها..
نحمد الله بأن أهلنا لم يمارسوا معنا هذا النوع من الضرب..
ولكن مارسوا معنا الضرب من أجل التأديب لأنهم دائما كانوا حذرين في عدم
ترك آثار جروح على أجسامنا.. لأن الجروح هي التي تسبب الحالات النفسية في المستقبل..
إستغلينا هذه الفرصة.. لذلك نفسياتنا وروحنا المعنوية كانت دائما
عالية ومرتفعة لأننا كنا نجد متعة وملذة خاصة في الجلد ونحرق روح أهلنا بالمكاواة علشان يجلدونا.
عام 1975 كنت موجود في مدرسة شدو.. احتمال كثرة عدد الأساتذة ما قدرت إتذكرك
يا أستاذ عمر.. وما أكذب عليك معرفتنا بالأساتذة كانت محدودة في الأساتذة الذين
درسونا أذكر منهم.. الأساتذة الأفاضل مدثر.. عبدالله الفكي الكامل.. ياسين.. كمال.. معتصم.. المرحوم عباس شدو..
عصام.. وعلاقتنا كانت وطيدة بهم خاصة الأستاذ مدثر لأنه كان أبو الفصل منذ دخولنا المدرسة ولغاية تخرجنا
وكلهم كانوا بيلعبوا معانا كورة ما عدا الأستاذ عباس شدو ناظر المدرسة..
ويا لها من أيام..
مودتي وتقديري.

[خالد هاشم علي]

عزيز دنياي ( أبو لينا)...
أول حاجة الشوق شديد ومشكور علي سؤالك عني وياها دي المحرية فيك....
بخصوص الذكريات والجلد فأنا أخدت علقات في الدنيا دي ماأخدها نشال في السوق... لاني كنت شقي وشليق وكمان كانت أقدميتي تعبانة وسط أخواني ( قبل الأخير) ونحن ناس عندنا في بيتنا أهم حاجة تحترم الأقدمية ( والله عسكرية بس ). عشان كده كنت بتعلق من اخواني الكبار ومن الوالدة ( الوالد ماكان بدقني وكان مدلعني) لكن ماكان بتدخل ولا يحجزني لو جاتني علقة ولا حاجة زي دي.
الذكريات كتيرة ولي عودة.

[عزيز عيسى]

بخصوص الذكريات والجلد فأنا أخدت علقات في الدنيا دي ماأخدها نشال في السوق...
والله حكايتك حكاية يا ودهاشم يعني مجلود في البيت ومجلود في المظاهرات
أنا لو منك كنت مشيت علي العسكرية على الأقل أرحم ما فيها جلد..
لكن النشال لما يقولوا حراااااااااااامي السوق كلو بيجي يدق فيك..
دا غير التشلت والتجضم والتفاف في الوجه والكفوف وتشرط هدوم
عليك الله دي حالة؟.. أخير منها دق البيت..
تتذكر لما الواحد يدوه علقة ساخنة يقوموا يقولوا ليهو:
تاني تجي الزفة؟

[فادي الماحي]

السلام عليكم ورحمة الله وبركاته
تحياتي وأشواقي أخواني وأحبائي في المنتدي الحبيب ود مدني وكم أشتقت لكم واظنكم تدرون الحال في السودان الحبيب حتي تجدون لنا عذر الانقطاع الذي نأسف أن غبنا عن كوكبه من امثالكم , عشنا معكم لا ينسي , ولكن بالرغم من مروري القليل علي المنتدي , غابت عنه الكثير من الدرر وبالتالي سيكون الاشراق بوجود درر نتمني أن تكون أكثر اشراقا لترسم لوحه مشرقه لكل ما هو سوداني ؛
اخ عزيز أرجو أن لا اكون قد أطلت المقدمه ولكني حقيقة مشتاق لكم غايه الشوق
وكمان بخصوص الضرب زمان هو دا ذاتو البجيب اجيال يعتمد عليها في بناء البلد للمستقبل وما نسمع كلام المتفلسفه بانو الجلد دا اسلوب ما حضاري وفيهو انتهاك لحقوق الاطفال وربما يعرضك لي تهمة الارهاب .
المهم النتيجه بالخواتيم . الجيل السابق لا جيلنا
ولك التحيه عزيز

[التيمان]

لا اله الا الله

والله كلنا حنينا عليك

ربنا يعينك

لكن حقو تالفا فى كتاب تعملها قصه

[ابراهيم]

والله يا عزيزنا قصتك غريبة ..
واخوك دة كان عامل زي جيمس بوند ..
انا كنت لمن يجلدوني بطفش من البيت وبجري لي حبوبتي البودى قارد بتاعي
كان عندي خالي عامل زي اخوك دة هو الوحيد البقدر علي ..
لكن سرعان ما الكتوف اتلاحقت وقلت ليهو دقست يا خال:D
قلت لي خرمان ليك لي جلدة .. شيل ليك صوت عنج وامشى للمصارعين العندكم اخد ليك كم صوت
لكن بعدين انا مش مسئول:D

[راشد خضر]

العزيز / عزيز ههه :p هههه واللّه فطستنا ، ليه؟ لأنه الطفولة في الحي السوداني لا تخلوا مما ذكرت وأنا شخصياً طفولتي كانت شغاوه شديدة صعب صعب جد ، ولكن المشاكسين دائماً يطلعوا ملحلحين وأكثر إحتمالاً من غيرهم
ويحظوا بنجاح في كسب عيشهم . فا سكت ساي قولي أي حا جة في رأسك أقولك بيعتها ، لاخلينا خضار ولا محاصيل ولا بيض ولا حمام ولا جداد حايم في الحلة حتي البعر والبقر والحمير والبط هههههه كله كله إشتغلنا فيهو

[SIZE=4]وفـــــــــــعلا الموضـــــــــــوع جميـــــــــــل

[عزيز عيسى]

السلام عليكم ورحمة الله وبركاته
تحياتي وأشواقي أخواني وأحبائي في المنتدي الحبيب ود مدني وكم أشتقت لكم واظنكم تدرون الحال في السودان الحبيب حتي تجدون لنا عذر الانقطاع الذي نأسف أن غبنا عن كوكبه من امثالكم , عشنا معكم لا ينسي , ولكن بالرغم من مروري القليل علي المنتدي , غابت عنه الكثير من الدرر وبالتالي سيكون الاشراق بوجود درر نتمني أن تكون أكثر اشراقا لترسم لوحه مشرقه لكل ما هو سوداني ؛
اخ عزيز أرجو أن لا اكون قد أطلت المقدمه ولكني حقيقة مشتاق لكم غايه الشوق
وكمان بخصوص الضرب زمان هو دا ذاتو البجيب اجيال يعتمد عليها في بناء البلد للمستقبل وما نسمع كلام المتفلسفه بانو الجلد دا اسلوب ما حضاري وفيهو انتهاك لحقوق الاطفال وربما يعرضك لي تهمة الارهاب .
المهم النتيجه بالخواتيم . الجيل السابق لا جيلنا
ولك التحيه عزيز
العزيز والرائع جدا الأخ فادي الماحي،

أهلا ومرحب بيك والمنتدى نور بعودتك..
وينك يا غالي مسجل غياب الفترة دي كلها..
والله ليك وحشة..
منذ أن سافرت السودان إنقطعت أخبارك.

وشكرا كثير على المرور والتعليق..
سألت العديد من الأجيال القديمة
حيث إتفق معظمهم على أنه الأستاذ والجلد كان
لهم الفضل الكبير في وصلوهم الى المستويات
التعليمية والمناصب التي تولوها..

أرجو التواصل.. وودالماحي ببلغك تحياته.

[عزيز عيسى]

لا اله الا الله

والله كلنا حنينا عليك

ربنا يعينك

لكن حقو تالفا فى كتاب تعملها قصه
حباب التيمان،
أشكركم على الحنية والشعور الطيب..
القصة دي ممكن نألفها في كتاب دا لو حكيتوا لينا
ذكرياتكم مع الجلد زمان.
كدي هسع ورونا منو الكان فيكم شقي زمان؟

[عزيز عيسى]

والله يا عزيزنا قصتك غريبة ..
واخوك دة كان عامل زي جيمس بوند ..
انا كنت لمن يجلدوني بطفش من البيت وبجري لي حبوبتي البودى قارد بتاعي
كان عندي خالي عامل زي اخوك دة هو الوحيد البقدر علي ..
لكن سرعان ما الكتوف اتلاحقت وقلت ليهو دقست يا خال:D
قلت لي خرمان ليك لي جلدة .. شيل ليك صوت عنج وامشى للمصارعين العندكم اخد ليك كم صوت
لكن بعدين انا مش مسئول:D
شفت كيف يا برهوته كان بلطشونا زمان؟ http://www.asmilies.com/smiliespic/evil/027.gif (http://www.asmilies.com)
أنا كنت جيمس بوند وأخوي سرتانا لايرحم..
حبوبتك البودي قارد بتاعتك الظاهر كانت معاك في مدني..
لكن حبوبتي أنا كانت في سنار المدينة.. لو عايز أجري عليها
إلا أركب القطر أسافر وبعدين أنزل في سنار التقاطع.. ومنها أركب
الدفار لغاية سنار المدينة.. يازول أخير الجلد.
ناس المصارعة ديل ما ناس جلد.. ديل بيشيلوا الواحد
يدقوا بيهو الدلجة أو يرموه خارج حلبة المصارعة..
إنت عايزني أمشي أجيب أجلي بنفسي؟
http://www.asmilies.com/smiliespic/sport/091.gif (http://www.asmilies.com)

[عزيز عيسى]

العزيز / عزيز ههه :p هههه واللّه فطستنا ، ليه؟ لأنه الطفولة في الحي السوداني لا تخلوا مما ذكرت وأنا شخصياً طفولتي كانت شغاوه شديدة صعب صعب جد ، ولكن المشاكسين دائماً يطلعوا ملحلحين وأكثر إحتمالاً من غيرهم
ويحظوا بنجاح في كسب عيشهم . فا سكت ساي قولي أي حا جة في رأسك أقولك بيعتها ، لاخلينا خضار ولا محاصيل ولا بيض ولا حمام ولا جداد حايم في الحلة حتي البعر والبقر والحمير والبط هههههه كله كله إشتغلنا فيهو

[SIZE=4]وفـــــــــــعلا الموضـــــــــــوع جميـــــــــــل
يا راشد،

زمان كنت ببيع عربات السلوك وعربات التروس والقلابات..
وبخرط الأولاد في لعب البلي.. لعبت طره وكتابة
ولعبة المثلث بتذكر كان عندي ضراب كبير (طرنقاش)
بكسر بيه البلي غتاته.. لكن الخضار ما تاجرت فيه..
لا حول يازول إنت كنت شقي خلاص..
تبيع بس لكن ما بتشتري.
http://www.asmilies.com/smiliespic/3dsmilies/36_9_2[1].gif (http://www.asmilies.com)