الولاء للاحذيه

[عشوشه]

ثمة اشياء ترافقنا عمراً بحاله
ثمة اشياء عندما تموت او تبلى نرمى بها فى اقرب سلة زباله غير مأسوف عليها
أنها احذيتنا حملتنا عمراً بالزمان على رقم من ثقل اوزاننا.
ألا تستحق قصيده حب؟
ألا تستحق روايه نخلد بها تأريخها معنا؟
ألا تستحق لوحه تشكيليه او سيرياليه؟
وحده فان جوخ خلد خذائه بلوحه عاشت وبعيت بملاين الدولارات (30 الف دولار) ثمن لوحه الحذاء لفان جوخ.
الاحذيه لها تأريخ واصل وجذور الحذاء عندما كان طقلاً كان من لحاء الاشجار وتطور الحذاء نمى وصار شاباً يصنع من جلود الحيوانات وفرائها النمر والثعبان والتمساح هم الاغلى وهناك الاحذيه المصنوعه من الذهب ومطرزه بالؤلؤ والماس.
وصارت للاحذيه تجاره عريضه المكاسب واصبح لهاسوقاً ينافس السلع الأخرى .
اصبحت المصانع تدور لتنتج ملايين الاحذيه لنا نحن الحفاة.
كم من الدورب سارت معنا وكم من الشوارع والأزقه عرفتنا بها.
عندما نشتم بعضنا تقول يا جزمه وهى اسوأ انواع الشتيمه لماذا؟
وهناك من قال لا يحضرنى أسمه (شعب اذا ضرب الحذاء برأسه قال الحذاء بإى زنب اضرب)
للاحذيه اسماء كتيره منها الجزمه النعل والصرمه والبادى الصندل عند العرب والشوام
اما نحن كسودانين لنا اسماءنا ومسميتنا حسب الحوجه فتجد المركوب والمركوب انواع
وعند النساء الشبب ودكتور شول وتموت تخلى ( وشب شرب ) البعرف الشب شرب منو؟
وزمان كان هناك شباشب القش والعشر .
الحذاء يحدد مستواك الاجتماعى والثقافى وهو كمان بحدد مزاج صاحبو يعنى لو كان ضيق بتلقى اخلاق صاحبو ضيقه لانو ما مرتاح .
ويقاس جمال النساء عند بعض الشعوب بمقاس احذيتهم فى اليابان مثلا تفضل صاحبة القدم الصغيره]

[سوار الياسمين]

عشوشة تحياتي ليك

ونوع الولاء بتاعك غريب ويحير


وتسلمي على الموضوع

[عشوشه]

عشوشة تحياتي ليك

ونوع الولاء بتاعك غريب ويحير


وتسلمي على الموضوع
سوار الياسمين تحياتى وسلامى
نوع غريب من الولاء ؟
الحذاء مظلوم معانا بنعاملو بى قسوه زيو زى الحمار مع انو الحمار طيب وحنين بس نحنا متهمنو زور بس انا حبيت ازكر الجانب الطيب لانو لو قام وفكر انو يرد اعتبار لى نفسو صدقينى احنا البشر ح نتعب كتير اهو لمسه وفاء للحذاء ليس الاز
ودمتى سواراً للياسمين

[نور العيون]

تسلمي يا عشوشه و ما قصرتي

[عزيز عيسى]

عشوشة ازيك،

موضوع ظريف جدا..

عندي باتا وكبك من زمن حبوبتي حية..
(بابا) إشترى لي الباتا بـ 15 قرش.. والكبك بـ 25 قرشا صاغ..
كل مره بستخدم رقعة عجلات (وسلسيون) برقع فيهن بالجنبات..
لكن الحكمة محل الكعب سليم يعني ما لاقي طريقة إتخلص منهن
لأنو علاقتي بيهن أصبحت وثيقة وصعب علي أرميهن..
لكن اليومين ديل جزمتي بتوجعني..
:D :D :D

[عشوشه]

عشوشة ازيك،

موضوع ظريف جدا..

عندي باتا وكبك من زمن حبوبتي حية..
(بابا) إشترى لي الباتا بـ 15 قرش.. والكبك بـ 25 قرشا صاغ..
كل مره بستخدم رقعة عجلات (وسلسيون) برقع فيهن بالجنبات..
لكن الحكمة محل الكعب سليم يعني ما لاقي طريقة إتخلص منهن
لأنو علاقتي بيهن أصبحت وثيقة وصعب علي أرميهن..
لكن اليومين ديل جزمتي بتوجعني..
:D :D :D
عزيز عيسى
انت قلت بابا ولا بتهأ لى بابا شنو يافرده اتاريك حنكوش ومتبرجز وانا ما عندى خبرك
اى صعب انك ان تخلص منهم لانو بتكون لصقت فيك بالسلسيون دى الحكمه فى حاجات زمان مش كان فى حاجه اسمها تموت تخلى بس ياهن زاتهم ديل لما تموت ان شاءالله بعد خرف بتوارثوهم اولادك
بس ما جاوبت لى على الشب شرب
بما انك بتقول بابا اكيد ما ح تعرفو :D

[عزيز عيسى]

عزيز عيسى
انت قلت بابا ولا بتهأ لى بابا شنو يافرده اتاريك حنكوش ومتبرجز وانا ما عندى خبرك
اى صعب انك ان تخلص منهم لانو بتكون لصقت فيك بالسلسيون دى الحكمه فى حاجات زمان مش كان فى حاجه اسمها تموت تخلى بس ياهن زاتهم ديل لما تموت ان شاءالله بعد خرف بتوارثوهم اولادك
بس ما جاوبت لى على الشب شرب
بما انك بتقول بابا اكيد ما ح تعرفو :D
يا عشوشة يا فردة..
في البداية كتبتها أبوي لكن غيرتها قلت يمكن عشوشة تقول لي (الببو اليشقك).. :D
عشان كدا مسحتها ووضعتها بين قوسين (بابا) لزوم الحنكشة..
كلمة (الشب شرب) ما عرفتها أول مرة أسمع بيها..
حظك حتقول لي طلعت حنكوش.. لكن بيني وبينك
بتعرفي (الشقيانة).. كدي أشرحيها لي ياتو نوع من الأحذية؟
ونشوف منو الفينا حنكوش..
أخوانا الزنوج هنا الواحد بتكون عندو (الله يكرمك) جزمة أكل وشرب عليها الدهر
تلقاهو مرقعها وعامل ليها عملية تجميل كذا مرة بوضع طبقات من تحت..
ومرات تلقى أصابعينو خارمات الجزمة وظاهرة بره ..
ولما الواحد ربنا يفتحها عليه يقوم يشتري حذاء جديد
ويربط الفردتين القدام من محل الرباط ويجدعهم في سلك الكهرباء
علشان كل ما يجي ماشي بالشارع يديها نظرة إعجاب..
لأنها عشرة سنين وبيصعب عليه يتناساها أو يتخلى عنها.

[عشوشه]

والله ياعزيز انت حاقر بى جنس حقاره !!!! :mad:
اصلا خير وسيله للدفاع الهجوم عايز تنسينى حتة حنكشتك وجايب لى سؤال صعب
اولا حاجه يازيزو ده اسمك بعد الحنكشه :D
حسى بقول ليك ببو الليشقك بابا شنو الليك
الشب شرب هو التموت تخلى زاتو بس بعد يضربو بوهيه كده كم لون من الوان الطيف بكون جميل وظريف ببقى شب شرب هو نوع مطور من تموت تخلى تقدر تقول الجيل الثانى منو
اما الشقيانه هى حذاء من جلد من البقر بى سيور تصدق قريبات دى طلع موضه !!!!

[عزيز عيسى]

لكن يا فردة طلعتي حنكوشة وكمان بشهادة..
عشان كدا لازم أحقر بيك.. :D
تقولي لي الشقيانة مصنوعة من جلد البقر..
الشقيانة يا ستي مصنوعة من لساتك العربات..
يعني اللستك لما (يتلجن) بيقوموا (النقلتية) يعملوا منو
أرضية لحذاء الشقيانة.. تعالي قولي لي يتلجن ونقلتية
معناهن شنو؟..
وسميت الشقيانة لأنو لستك العربية ما صدق إنو
نزلوا المعاش وإرتاح يقوم يجي النقلتي يعملوا أرضية للحذاء
ويبدأ في العمل تاني من جديد ويظل شقيان طول العمر لأنو
الجزمة ما حتتقطع وصاحبها حيكون حايم بيها الدنيا كلها
ليل نهار.
الشقيانة دي كانت موضة على ما أعتقد في بداية عام 80
والشباب لما يلبسوها ويجوا ماشين بيها في التراب تحلفي
تقولي لاندروبل ودالمأذون جاء ماري بيجاي.
لو في طريقة رسلي لي الشب شرب.

[عشوشه]

لكن يا فردة طلعتي حنكوشة وكمان بشهادة..
عشان كدا لازم أحقر بيك.. :D
تقولي لي الشقيانة مصنوعة من جلد البقر..
الشقيانة يا ستي مصنوعة من لساتك العربات..
يعني اللستك لما (يتلجن) بيقوموا (النقلتية) يعملوا منو
أرضية لحذاء الشقيانة.. تعالي قولي لي يتلجن ونقلتية
معناهن شنو؟..
وسميت الشقيانة لأنو لستك العربية ما صدق إنو
نزلوا المعاش وإرتاح يقوم يجي النقلتي يعملوا أرضية للحذاء
ويبدأ في العمل تاني من جديد ويظل شقيان طول العمر لأنو
الجزمة ما حتتقطع وصاحبها حيكون حايم بيها الدنيا كلها
ليل نهار.
الشقيانة دي كانت موضة على ما أعتقد في بداية عام 80
والشباب لما يلبسوها ويجوا ماشين بيها في التراب تحلفي
تقولي لاندروبل ودالمأذون جاء ماري بيجاي.
لو في طريقة رسلي لي الشب شرب.

زيزو بطل سلبطه :mad:
الشقيانه ياها زاتها الشب شرب وتموت تخلى تعددت الاسماء والمعنى واحد
قالو ياهو زاتو بتاع جلد البقر
خلاص برسل ليك شب شرب من عندى وبالمره معاه شقيانه جلد :D

[ابراهيم]

والله يا عشوشة الموضوع في حبة لبس
والناس اهتماماتها بتختلف
التشكيليين على سبيل المثال اهتماماتهم غير اهتمامات الناس العاديين
يعني بعملو من الفسيخ شربات على قول المثل يعني مثل الحذاء عندنا مستخدم للإساءة في عبار "يا جزمة"
لكن جا فان جوخ وشكل منو لوحة جميلة واستفاد منو شرديت ودة وجه الاختلاف بين الفنان والعادي
اما نحن بالكتير نحتفظ بيها للذكرى
عندي سفنجة جيت بيها من السودان قاعدة معاي تلاتة سنة وحاجة اتسحكت عديل بقت زي صورة الاشعة لكن ما قادر افارقها وانشاء الله اكتب فوقها قصيدة وكان بعرف ارسم كان رسمتها زي فان جوخ:D
وفي ناس الواحد يمشى السوق يشترى حذاء ويخلى القديم قدام محل الاحذية غير مأسوف عليه وبلا تقدير لما عاناه الحذاء من عناء في شق الطرقات والمشى والجري والهرولة .




ويقاس جمال النساء عند بعض الشعوب بمقاس احذيتهم فى اليابان مثلا تفضل صاحبة القدم الصغيره



هم ناس جاكي الشان ديل ما كفاية عيونهم صغيرة:D