القديم والحديث في تربية الاولاد

[elfatih61]

[size=3]

بذكر زمان لمن كنا صغار 00 لمن الواحد فينا يعمل غلط تسمع ليك كلمة كلمتين من أمك وأخرها تقول ليك أصبر
لمن يجي أبوك من الشغل 000 يجى الوالد وقت الغدا تاخد جلدتك ويمكن تحرد بعدها الغدا 0 والعصر تطلع تلعب
كـورة وترجع وتكون نسيت الجلدا ديك ونسيت كل حاجة إلا الشىء الضربوك عشانو 00 يعنى تانى ما بترجع ليه
ولا بتتصرف غلط 00 والحمدالله إتربينا كدا وعلاقتنا بي أهلنا الجلدونا ديل إحترام شديد وأدب قدامهم وأبهاتنـــا
كان ليهم هيبه وحدود ما نقدر نتعداها 00 وهكذا كانت أحوال كل البيوت تقريبا في الســـودان وإتربوا النــاس
على كدا 0 وكانت أحسن تربيــة وأحلى أيام 00

هســه 00الوضع إنقلب وطلعوا لينا بي حاجات جديــدة كده 00 ما تضرب الاولاد ! إذا ضربتهم بكونوا معقديــن 00 !!
إذا ضربتهم بكونوا منذويــن وما ذي الاولاد التانيــن !! إذا ضربتهم ح يكونوا بتمتموا في الكلام وما عندهم
شخصيـة !! و و و و و000 الخ

ونحن وأنا حيرانين 00 ما عارفين نربي أولادنا ذي ما ربونا أهلنا ونطلعهم رجــال 00 !!
ولا نتبع الدراسات الحديثــة البقولوا عليها دى ونمشى وراها وما عارفين يطلعوا لينـا شنو 00 !!

* أرجو أن نطرح هذا الموضوع للنقاش00 ونريد نسمع أراء بعضنـا *

وأتمنى في الاخر نطلع بالفائـدة التى تهم الجميـع 00 وتوكلوا معاي يا جماعــة 00 ونسمع !!


الفاتح

[قسم السيد الشيخ]

التربية اساس اذا كان الاساس سليم فلا خوف ولذلك لابد من اساس متسن مبني علي اقيم والاخلاق الفاضلة منذ الصغر لذلك قالوا التعليم في الصغر كالنقش علي الحجر ، والتربية عموماً تحتاج لمختصين ، ولك زمان رجاله ولكل مكان مقوماته فزماننا يختلف عن الزمن الحاضر ، والحياة كانت صعبة شوية في زماننا والان تغير الوضع وصار الانفتاح علي العالم الخارجي هو الذي يسير حياتنا ،ومتغيرات كثيرة حدثت ، ولو قدر لنا الن نولد في هذا العصر لكانت طريقة تربيتنا تغيرت الي ما هو حاصل الان ، فهنالك سلبيات وايجابيات ولكن الايجابيات افضل في الزمن الحاضر ، وتنوعت اساليب التعليم والمعرفة والحياة صارت اسهل من ذي قبل ، لذلك نقول لكل زمان رجاله والموضوع ، يحتاج لدراسة وتقييم من جميع الجوانب ، ونترك المشاركة مفتوحة لبقية الاعضاء للخروج بتصور اوسع وتحاليل أكثر ..................

[امل حياتى]

والله اخوى الفاتح كلامك كله صح نحنا زمان كنا بنلعب العاب عجيبة عربات سلوك وشليل باللستك ولما الواحد يأجر عجلة معناه معلم كبير اما الان Play Station والعاب كمبيوتر وافلام Mp3 وغيرها ويا احليل زمان
مشكور اخوى الفاتح يعطيك الف عافية

[salwa]

اخي الفاتح
موضوعك راقي ومهم جدا نقاشه ولكن في شيء مهم جدا يجب الالتفات ليه وهو ان ابنك على حسب ما تعوده اي بمعنى اساسك في التربية مهم لانه الاساس ان صح فبعد كده خلاص انت في قمة الاطمئنان على ابنائك لانه طالما انت اديته الطريق الصح هو او هي حتمشي عليه ومع ذلك المراقبة المستمرة دون توقف وعناء التربية شيء ما ساهل ولكن عشان في النهاية تفتخر بولدك او بنتك وانت مرفوع الراس وزي ما قلت زي ما ربونا ابهاتنا فيجب ان نفعل مع ابنائنا ومع تعليق بسيط انه الاسلوب مفروض يكون واحد دون النظر الى زمان والان فالتربية سيان زمان او الان واحد فلم تتغير القيم ولا العادات والتقاليد بل الزمن وحده هو الذي تغير وده مقدور على ان تمشى معه في حدود عاداتنا برضه... وتسلم الفاتح

[خالد هاشم علي]

موضوع جميل أخي الفاتح وسبق لي أن تناولت نفس الفكرة في بوست بمنتدي ودمدنيات وتحدثت فيه عن المتغيرات والتربية ( الحديثة).
يالفاتح خليك من الوالد والوالدة والأعمام والخيلان والأخ الأكبر ... زمان الجار كان بربيك... يعني لو انت غلطت وشافك جاركم ماحيستني ويقول ليك بكلم ليك أبوك... لا الجار كان عندو الصلاحية انو يأدب ويقوم ويربي ويديك علقة ماحصلت وممكن العلقة تكون قدام أبوك وأبوك مايسأل جاره ( ليه دقيت ولدي؟؟؟) وياويلك لو جيت إشتكيت لي أبوك ... إحتمال 99% تاخد ليك علقة تاني لانو أبوك بقول ليك ( لو انت ماكنت غلطان ماكان الجار جلدك) .
والله يالفاتح لغاية التسعينات أنا كنت عامل رعب لي شفع فريقنا ولو في واحد من الجيران عامل شغب طوالي ينادوني ليهو والعجب لو في شافع اتشعبط في أمه وقال إلا يمشي معاها... تقول ليهو ياولد أرجع ياولد أرجع ... وطبعا الولد بكون مدلع حبتين ويقعد يبكي ويقول ليها ابيت مابرجع وأول مايوصلوا قدام باب بيتنا تكورك لي ياخالد تعال شوف الولد ده.... طبعا بمجرد فتح الباب الولد يقوم جري علي بيتهم ويكون أبوهو وااقف وشايف المنظر ده ومايتضايق ولا يزعل... لكن هسة شوف ... ماتقدر تقول كلمة حتي لي قريبك ( الحمد لله نحن عندنا لسه متمسكين بحكاية العم والخال يأدب من طرف يعني الوحيدين اللي بقدر افتح خشمي معاهم ولا أديهم علقة هم أولاد أخواني وأولاد أخواتي).
والله التربية الحديثة دي مصيبة ... مافي مانع الناس تواكب العصر والتقنيات لكن عمر الثوابت ماكانت من التقنيات ولا تحتاج لمواكبة... الأدب وإحترام الكبير وحاجات كتييييييييييييييييييييرة إختفت تحت مسمي التربية الحديثة وبالطريقة دي حيجي جيل يجضم أمه وأبوهو عاااااااااااااااااااااادي .
ولي عودة

[دكتورة صغيرة]

والله الموضوع دة جميــــــــــــــــــــل جدا وحاجة تستاهل انه الناس تقيف عندها .. انا رايي انه التربية الحديثة غلط مائة في المائة وتربية زمــــــــــــــان احسن مليون مرة لانه كان في احترام للكبير مهما كــــــــــان حتى لو كان غلطان انا شخصيا شفت خيلاني الصغار حتى بعد ماكبروا وبقوا رجــــــــــــــــال بيقيفوا على حيلهم لمن يمروا أخوانهم الاكبر منهم ..دة التربية .. مع اني ضد الضرب للاولاد لانه مابيربي بالذات اذا زاد عن حده وبقى في الصغيرة والكبيـــــــــــرة لكن مفروض يكون الضرب لمن تجي حاجة تستاهل .. وارجع أقول اهم حاجة في تربية الاولاد تعليمهم الاحترام لأنه دة أســـــــــــــــــاس التربية فعلا ..
وشــــــــــــــــكرا على الموضوع الرائـــــــــــــــــــــــــــــــــــــــــــــ ــــــــــــع .. :)

[elfatih61]

أعزائــي 000
( قسـم السيـــد ) 00 ( أمل حياتــي )
( سلـوى ) 000 ( خالد ود علـي )
و ( الدكتورة الصغيــرة )

تناولتوا الموضوع بجوانب مختلفـة وسعدت كثيـرا بسماع أراءكم التى أحترامها
كثيــراً 00 وشكرا لما دلوتم بـه 00 ويا أعزائي الموضوع كبيـر 00 ونتمنى أن
نسمع أكثـر 00 حتى نخلص لنتيجـة يستفيـد منها الجميــع 00

( وتسلموا إنتو يا غالييين )

* الفاتح *

[سواااح]

اخي الفاتح ..

بتقدم الزمن والعمر هناك امور واشياء

بعضها سقط سهواً

والاخر للاسف سقط عمداً

بدانا نفقد اشياء جملية ولها دور كبير في التربية السليمة المستقيمة

ومن ذلك ما ذكرت انت عدم الالنصياع لكلام الكبار واصبح الان للوالدين

الامر متشعب وكما قلت انت ان عاقبتهم يقلون لك ستصيبهم عقد نفسية

هنا لدي سؤال بسيط :

لماذا لم تخرج الاجيال السابقة التي تم التعامل معها بذاك الاسلوب معقدة او ناقصة شخصية ؟؟

حسب اعتقادي لاننا ندرك عندما نعاقب فذلك لخطا ارتكبناه

والخطا لابد له من عقاب

لذلك فان الامر لا يحز في انفسننا

لا ضغينة ولا كراهية ويسير طبيعياً ..

دمـــــــــــــــــت ،،

[elfatih61]

والله يا سواح 00 العقد والامراض النفسية والانطواء
والشذوذ والانزواء حاجات ما ظهرت وما سمعنا بيها إلا مع
تربيتهم الحديثة البقولو عليها دى 000
ناس زمان يا حليلم 00 ضربوهم وجلدوهم وطلعوا رجــال
يهزوا ويرزوا 00 والله يديهم طولة العمر والماعندوا كبيــر يشترى ليه كبيــر

[elfatih61]

يا جماعة مسعولين من الخيــر الداهي البقولوا عليه ( النت ) دا من مبارح مالو
ما شادى حيلوا كدا 00 أنا براى كدا ولا كمبيوترى عجز وكبر خلاص 000 والله
الحكاية عامة 000 ادونا الافادة يا يسعدكم عشان ما نقوم نلكلك فيه ساكت

[نزار حسن محمد]

العزيز الفاتح .. سلامات اولا انا برضوا امبارح حست النت ماتمام ماعارف الحاصل شنو لكن الليله استعدل والحمدالله ... طيب نرجع لموضوعك انا شخصيا يالفاتح ماشى بطريقة زمان وصدقنى ماحغيرها فى تربية ابنائ وقنعتى الشخصيه مايصح الا الصحيح والله يالفاتح الاخوه ماقصروا وماخلى حاجه نذكرها خاصتا الاخ خالد بس انا عندى اضافه صغيره زمان التربيه كنت مشتركه بين البيت والمدرسه لكن مع تدهور الحاصل فى مجال التعليم بقى الحل الوحيد تربيتك والاعتماد على نفسك و من هم حولك تعرف يالفاتح انا زمان كنت لمن اشوف الاستاذ بخلى الشارع خوفا واحتراما.. ياخى فى الصلاه لمن نشوف الاستاذ بنرجع الصف الوراء... وياحلبل زمان وتربية زمان.. مع ودى اخوك ودحسن

[ابراهيم]

سلامات اخوي الفاتح وكل الاخوان الذين ادلوا بدلوهم في هذا الموضوع


ارى انه لكل زمان ظروف وطقوس واهتمامات متباينة فالاشياء دوماً في تغير وتطور وبالتالي تنعكس الآثار على جيل الزمان المعاصر ..
والفرق بين زمان وهسى شاسع ومفجع
زمان ما كان في موبايلات ولا انترنت لكن الحياة الاجتماعية كانت افضل عكس الآن
زمان ما كان في زول بعاكس ليهو بت في الشارع لكن الآن بقى عادي
زمان كان في احترام للكبير وتوقير للصغير لكن الآن بدت تتلاشى هذه القيمة
من المقارنة بين التربية زمان والتربية هسي على السبيل الاجتماعي والثقافي والتربوي بتلقى في قيم كتيرة بدت تتلاشى او اتلاشت وما تبقى منها على الحافة والسبب في ذلك هو الغزو الفكرى بكل اتجاهاته وسبله المباشرة والغير مباشرة والذي لا يتلائم وطبيعتنا ولكن للأسف نجد انفسنا مقتنعين تحت جبروت تكنولوجيا العصر في الاستسلام لهذا الغزو الفكرى الذى طغى على القيم الاصيلة التي لم يتبقى منها الا القليل وغالباً وما تجدها في القرى والأماكن التي لم تطلها عصاة العولمة.

كما دخلت (الأزمات السياسية والاقتصادية والاغتراب) بطريقة غير مباشرة الى صرف الآباء والأمهات عن بعض الجوانب التربوية والاساسية في بناء انسان سوي صالح لنفسه واسرته وبالتالي المجتمع.
الاسباب اخى الفاتح كثيرة لا تحصى ولا تعد ..

وتحت كل هذا باستطاعة اي انسان ان يربي ابناؤه كما تربى بالقيم والاخلاق والثقافة الموروثات الاصيلة إلا ان هذا يتطلب جهود وتضحيات مضنية فمشاغل الحياة وظروفها العاتية احياناً تحول دون ذلك والله غالب.



لكم تحياتي وتقديري

[elfatih61]

العزاز الغاليــن ------------------------- نزار ود حسن 000 و أبراهومـــة

شكرا لا آرائكم ومداخلاتكم 00 والحمدلله إنو الواحـد شايف كل الناس بطريقة أو بأخرى
بتحاول تقول ( تربيــة أبواتنــا بتاعت زمــان ) هي التى إكتسحت كل النظريات في التربية
البقولوا عليها حديثــــــة دى 000 وأنا عارف في ناس بتقول زمان كان غير الآن !!!

لكن برضو ( الاصـل والجذور اللى نعتمد عليها في التربية تكون حقت زمــان ) 00 لكن مافي
مانع الناس تضيف بعض التعديلات على فروع شجرة التربية بما يتماشى مع متغيرات 00 ولكن
ما تنسوا الاصل الاصل في التربية ( تكون ذي ما ربونا نحن زمان )

كنت زمان في الابتدائي بسمع ناظر مدرستنـا دائما بقول
( الضرب ينفعهم والعلم يرفعهم )

وتسلموا يا غالين