هترشات فيفيد (الجزء الثاني)

[vivid]

المصدر الرئيسي


مجلة البهلة الإلكترونية



بت جيرانا . . نوباوية . . بت عينها زايعة و مطلوقة بالحلة . . جنها حفلات . . و تجي داخلة البيت مع قعور الليل . . البنت الوطواطة . . وكتين تتأخر ليها في حفلة قاعدة تتلب بي فوق الحيطة . . عشان أبوها ما يحس بيها . . داك الليلة و أنا جاي من السيلما . . شفتها تتدبا تحت حيطتهم . . اتكيفت . . و انبسطت . . و قعدت في الواطة و فقعتها ضحكة . . و قلت نوبة منار لن تنهار . . وكت تميت ضحكتي . . شفت البت النوباوية دي رفعت كراعها تسعين درجة . . و ختتها فوق راس الحيطة . . و شبّت في راس الحيطة . . الفستان مع رفعة الكراع وووررررررر انشرط . . اتلفتت بي قفاها . . يا رب ما يكون واحد شافها . . لقتني واقف جمبها . . قاعد في الواطة و أبحت من الضحك . . حمرت لي و صرت لي وشها . . و مدت يدها . . سختتني في وشي . . و قالت لي . . فييييفييييد؟؟؟!!!!!! . . أصبر لي بكرة بنظمك!!!!! . . قمت دخلت البيت و انا محتار فوق كلام البت دي . . رقدت في سريري . . نمت . . حلمت بي البت النوباوية . . جاتني و مسكتني من نصي . . و كتفت لي يديني وراء ضهري . . و عضتني في حلمة أضاني الشمال . . و أنا جااااااااااااااااك سرخت . . صحيت من النوم مخلوع . . لقيت جمبي ما في أي زول . . و حلمة أضاني اليمين تنتح . . و تنقط في الدم . . قلت يا ربي النوباوية بت الحرام دي . . تكون تلبت علي بالليل و أنا نايم ؟ ؟ ؟


الإشاعة جزء لا يتجزأ من نفسية المجتمع السوداني . . داك الليلة كنت راكب في مواصلات الحلة الجديدة . . سمعت لي مرأة قالت لي جارتا في المقعد . . سمعتي الخبر دا ياختي!!! . . الركاب وكتين سمعوا كلمة خبر . . اتلفتوا جت . . بي السواق تنى فقرتو و رخى أضانو . . قالت بعد ما ختت الخمسة فوق الاتنين . . قالوا في مرأة زعّلت راجلها . . الواطة انشقت نصين و بلعتا جب . . بتها شايلاها في فحتا . . وكتين الواطة انشقت . . سبحان الله انملصت من صفحتا . . و نطت تقول مترين من محل الشق . . و ما طالباني حليفة يا دي . . قالوا المرأة دي زعلت راجلها . . فوق سوات جبنة . . قال ليها سوي لي جبنة . . قالت ليهو أبييييت . . قال ليها ببو يشرطك . . قومي سوي الجبنة دي . . المرأة زعلت و قالت ليهو طظ فيك . . قالوا مع كلمة طظ دي . . الواطة انشقت و بلعتا . . شفتو المحن دي . . الحافلة وكتين المرأة انتهت من قصتا دي . . كلها قعدت تتشهّد و توحد في الله . . الكمساري نسى يشيل من المراة ست القصة الحساب . . و هي رفعت نخريها مترين في كبرياء نسائي واضح . . عشان قدرت تثير فضول الركاب . .اليوم التاني البلد كلها تتحدث عن الواطة البلعت المرأة فوق سوات الجبنة . . الحاجة دي كيفتني شديد و قلت بكرة أمشي أعمل لي أشاعة زي دي . . كان تفك لي زهجتي دي . . مشيت زنكي الخدار . . البشتري منو شيء أقول ليهو . . سمعت بي المرأة الشايقية الولدت ليها قرد؟؟؟ . . يقول لي لا . . أقوم أقول ليهو . . أجري روح شوفو الناس منكسرة فوق حي الشوايقة . . الأعمى شايل المكسر . . اليوم التاني . . لقيت خبر المرأة الشايقية الولدت قرد وصل بيتنا . . اتكيفت و قعدت أعرض في سهلة بيتنا من إشاعتي اللذيذة . . خالتي السعدية قالت لي يا فييييفيييد سمعت بي الشايقية الولدت ليها قرد؟؟؟!!! . . قلت ليها و أنا مدعي عدم المعرفة لالالالا يا خالة . . قالت لي كان كدا ورحكاكا من دربنا دا لي حي الشوايقة و نشوف الشايقية دي و ولدها القرد . . مشيت معاها حي الشوايقة . . دقينا الباب . . خالتي قالت ليهم . . دا بيت الشايقية الولدت قرد . . قالوا ليها آآآآآآي . . خشي اتفضلي . . الجماعة الشوايقة ديل شكلهم استفادوا من إشاعتي دي . . خاتين ليهم واحد عندو إضنين عراض فوق خشم الباب . . البجي داخل كلو بخلس منو حق التظراكر . . النفر بي خمسمية . . شالوا مننا أنا و خالتي السعدية ألف جنية . . دخلنا في أوضة الشايقية النفسة . . لقيناها منتكية و مكوعة و قدامها . . شافع شكلو زي القرد.

بريد العرقي . . لكن أصلو ما حصل ختيتو العرقي دا فوق خشمي . . بس بريد أشوف الناس و هي قاعدة تسكر . . و أي واحد بتعرف عليهو . . أسألو في اللوال انت بتسكر . . كان قال لا . . روحتي تتشحتف و أقوم أشجعو على السكر و شراب العرقي . . البلقاهو كلو أحمسو و أشجعو على خوض تجربة السكر . . كان قال لي لا . . أقول ليهو كان كدي انت ماك راجل . . قربة مقدودة و منفسة . . و فيك إن . . و إن كبيرة خلاس . . العرقي دا حق الرجال كان ماك عارف . . و أقعد أدودر فوقو لحدي ما أوديهو بيت النوبة جيرانا . . و أشتري ليهو نصية . . و أقعد أتفرج فوقو و هو قاعد يسكر . . و انتظرو لحدي ما يشبع . . و يترررررع و يدشا . . وكتين يترررررع و يدشّا قلبي يرقص طرباً على هذه النغمات ذات السلم السباعي . . و أنقنق ليهو تاني و أدودرو تاني و أخليهو يتسند فوق كتفي . . و يقول لي ست العرقي . . يا نوباوية هل من مزيد . . أتكيف و أقول ليهو . . نوباوية شنو . . أنا بجيبو ليك . . و أمشي لي النوباوية . . أقول ليها أديهو نصية تانية و صلحيها . . كان عندك بنج حصين و الا حجار بطارية سويهن . . و ما تخافي عليهو . . الترابة دي ما بتجيهو . . و الحساب كلو سجليهو علي . . بعد ما يسكر و يقيف لط . . أدرجو و أتكلو لحدي ما أوصولو بيتو . . و أقول ليهو . . هيييييع و الله انت راجل جنس رجولية .

عوض الكريم ساعي ليهو كلب . . قاطع موية و نور . . لا بتحرك و لا بنبح و لا بهوهو . . جنو نوم . . ما قاعد يطرى النبيح و الهيوهيو عيلا وكتين يشوفني . . ياربي الكلب دا شامي فيني شنو . . في اللوال قلت ممكن الكلب دا معجب . . و الا مشبهني علي واحد تاني . . داك الليلة جاهم حرامي . . و الكلب ود اللذينا دا افتكر الحرامي دا فيفيد . . ياالله و يامين قرر أنو ينبح و يصحي حاج عوض الكريم . . و عوض الكريم كان نايم مع مرتو و يشخر . . مرتو قالت ليهو . . سجمنا ياحاج . . قوم جانا حرامي . . قوم يا حاج شوف كلبك قاعد ينبح . . قال ليها نومي يا ولية يا مطرطشة . . نومي دا ما حرامي دا فيفيد الزفت . . اليوم التاني حاج عوض الكريم صحى من نومو لقى بيتو خاوي على عروشه.


فيفيد في 31/05/2006م


للوصول للجزء الأول زوروا موقع مجلة البهلة الإلكترونية

أو أضغط على الرابط أدناه
الجزء الأول من هترشات فيفيد (http://wadmadani.com/vb/showthread.php?t=8383)

[سواااح]

الغالي فيفد ..

انتو قصة الهترشه والهلوسه الدخلت علينا الايام دي شنو ؟؟

في الثقافي مهيرة واميمة

وانت في العام

الله يستر ..

لكن هترشتك مبالغة

دمــــــــــــــــت ،،

[zoolfrda]

والله لكن يا فيفيد إنت حكاي حكا وقصاصاً ... مبالغة لكن ...

إلاً الشلاقه عليك شنو يا بوي تفت ليهم شمار المرأة الشايقية الولدت ليها قرد؟؟؟ ... دحين الولد ده نوديهو وين

الظاهر عليك داير ليك عضة في حلمة أضانك اليمين ... أرقد نوم بس .. البت النوباوية راجاااااك

[sambaaa]

يا فيفيد ..

طبعا انا بقيت مدمن لقصصك وحكاويك و .. هترشاتك .. وخروجك الجرئ غير المتحفظ
الاسلوب القصصي رائع وممتع جدا ..

ودمت

[elfatih61]

فيفــد قصصك لذيذة شديـــد 00 بس كبر لينا الخط شويــة
العتب على النظر !!

[سوار الياسمين]

بالجد يا فيفيد هترشاتك مبالغة

وانا بقرى في الموضوع فقعتى ليك ديك يا الضحكة

كويس ما في زول معاي

لاكن عملتى عملية بطالة في ابوي طبعتها ليهو وهومكتبو جنب المدير

جى ينهرني هو بضحك اوعك تجيبي لي حاجة زي دي تاني

وهو مفقوع من الضحك

غايتو يديك العافية

[امل حياتى]

الغالي فيفد ..

انتو قصة الهترشه والهلوسه الدخلت علينا الايام دي شنو ؟؟

في الثقافي مهيرة واميمة

وانت في العام

الله يستر ..

لكن هترشتك مبالغة

دمــــــــــــــــت ،،

هههههههههههههههههههههههه
والله كلامك كله صح

[vivid]

الغالي فيفد ..

انتو قصة الهترشه والهلوسه الدخلت علينا الايام دي شنو ؟؟

في الثقافي مهيرة واميمة

وانت في العام

الله يستر ..

لكن هترشتك مبالغة

دمــــــــــــــــت ،،


سواح

انا عندي كتاب كامل بتاع هترشات

بس ناسيهو في محل و ما عارف وين

[vivid]

والله لكن يا فيفيد إنت حكاي حكا وقصاصاً ... مبالغة لكن ...

إلاً الشلاقه عليك شنو يا بوي تفت ليهم شمار المرأة الشايقية الولدت ليها قرد؟؟؟ ... دحين الولد ده نوديهو وين

الظاهر عليك داير ليك عضة في حلمة أضانك اليمين ... أرقد نوم بس .. البت النوباوية راجاااااك

انت شايقي يا فردة

الشوايقة قالوا بلدوا قرود

الكلام دا صحي

تسلم تسلم تسلم

على التعليق و المرور

[vivid]

يا فيفيد ..

طبعا انا بقيت مدمن لقصصك وحكاويك و .. هترشاتك .. وخروجك الجرئ غير المتحفظ
الاسلوب القصصي رائع وممتع جدا ..

ودمت



أعمل حسابك يا سامبا

فيها فيروسات القصص دي

ما تدمنها

[vivid]

فيفــد قصصك لذيذة شديـــد 00 بس كبر لينا الخط شويــة
العتب على النظر !!


ها زول ها انت مجلّي ذي حالتي دي؟؟؟

يسلموا العيون يا الفاتح

المرة الجاية نديك بالفونت العريض

[vivid]

بالجد يا فيفيد هترشاتك مبالغة

وانا بقرى في الموضوع فقعتى ليك ديك يا الضحكة

كويس ما في زول معاي

لاكن عملتى عملية بطالة في ابوي طبعتها ليهو وهومكتبو جنب المدير

جى ينهرني هو بضحك اوعك تجيبي لي حاجة زي دي تاني

وهو مفقوع من الضحك

غايتو يديك العافية


يا سوار

انتي قنعانة من أبوك دا

ما تديهو الحاجات دي قدام المدير

بعدين تجي تقاضيني

[vivid]

هههههههههههههههههههههههه
والله كلامك كله صح

مشكورين يا أمل حياتي

على التعليق و المرور

[Jamal Elmahi]

حباب فيفيد...حباب الاصيل ود الاصول...
هاأأأزول والله مع حكاويك دي الواحد كان لقي ليهو بنبر وعبارين تلاته وشوية أم فتفت علي الطلاق يدوبي للصباح...زورنا أأأبوي في دكان ود الصول باقي نضميك حلو وطاعم وجيب صعوتك معاك...
ود الماحي

[HaSsOoN]

حبيبنا فيفيد قطعتا مصارينا واللهي براحه علينا ....يديك العافيه وكتر من هترشاتك

[elfatih61]

شكرا يا فيفيـد لاهتمامك بزيادة البونـد 00

يا أخى إنت ليـه ما تخت لينـا ( صورتك ) مع كل موضوع بتكتبـوا
بتخليل لي الواحد شايف صورتك وهو بقرأ في حكاياتك دى ح
تكتلنا عديــل كده بالضحـــك !!!
( مجرد إقتراح )

[اميمه عشريه]

تحياتي اخوتي هذا تعليق كنت قد كتبته في قسم المشرفين بخصوص قصه فيفيد ردا على بوست ود الماحي ... هذا رأي شخصي يرجع لي واختلاف الرأي حتما لا يفسد للاخوه اي قضيه ... تقبلوه بصدر رحب فقد اكون مختلفه مع البعض منكم هنا حول الصياغه الادبيه حينما تندرج تحت الخروج عن النص بمعني ان نأتي بأناس نستهزئ بهم فقط لنخرج بنص ادبي مضحك ...

اليكم رأيي بصراحه ,,,,,,,,,

اختلف معك ود الماحي اختلف معك جدا اتدري لماذا لا يوجد مصوغ ابدا يدعنا نترك لاي قلم ان يدعي الابداع الادبي فوق رفات اشياء مهمه لو تم حذف نصف هذه القصص لن تؤثر ابدا في الصياغ الادبي لان ما بها ثرثره وصفيه لا تدخل في متن القصه ولا تؤثر في بنائها فلماذا اذن بينما نحاول الابداع نجرف في طريقنا اشياء اهم بكثير من كوننا نكتب ... فيفد قد يكون راوي قصصي جيد جدا ولكن هذه الانزلاقات والخروج عن النص الادبي الملتزم هو ما يستدعي المقص تلقائيا لاجتثاثه نحن لا نريد ان نضحك ونقهقه فوق احداث سرديه تضر بالاخرين ايا كانو وكيف كانو دعونا نلتفت لهذا الجزء جيدا فنحن نجلس في مقهي ادبي كبير جدا لا يمكن ان نسمح بدخول كل ما هو مبتذل بحجه ان هذا شئ معاش او غيره فما كل ما هو معاش يكون صالحا لنقله هنا ...

وسأنقل لفيفد نفس وجهه النظر هذه ... هنا نبدع ونثور من ضجه الالق وتنبت لنا ايادي ثالثه ورابعه لنكتب بها كل ما هو جميييييييييييل وانيق ...

[vivid]

حباب فيفيد...حباب الاصيل ود الاصول...
هاأأأزول والله مع حكاويك دي الواحد كان لقي ليهو بنبر وعبارين تلاته وشوية أم فتفت علي الطلاق يدوبي للصباح...زورنا أأأبوي في دكان ود الصول باقي نضميك حلو وطاعم وجيب صعوتك معاك...
ود الماحي



جاينكم في دكان ود الصول قريب يا جمال

جهز لي عنقريبي

عندكمو واحد بصقصق الأصابعين؟؟؟

رطوبة جدة نشفت الكرعين

كان عندك كراشة ضهر برضو جهزها

[صالح ابوشوارب]

اولا الشكر الجزيل للاخ سامبا الذى قام بقص الكلام الغير كريم لاخوانا النوبة
ثانيا الاخ فيفد لم توفق فى كلامك عن النوبة وليكن معلوم لديك بان النوبة في مدني جزء من النسيج الاجتماعى وهم يسكنون معنا فى الحى وخاصة حى الدباغة وهم جيران لنا ونتداخل معهم ونأكل من ايديهم النيفة والضلوف ( كوارع ذى المندى ) وهم يعملوا معنا في السلخانه في مدني وهم يشاركوننا في حفلاتنا وافراحنا بفرقة الكمبلا والان هم وزراء في الوزارة الاتحادية ( وزيرة الصحة د / تابيدا بطرس والاخ الفنان جراهام مقدم برامج التراث و و و و
وليكن معلوم لديك هذا المنتدى يحترم الديانات والاعراق

[waheeb]

الاخ فيفد..
سرد رائع .. لم اتوقف الا عند الحرف الاخير من هترشاتك..
اختلف قليلا مع بعض الاخوه لان الاخ فيفيد وكثير من الذين يكتبون عندكما يتعرضون في كتاباتهم لاي جنس او قبيله فهذا لا يعني استهتارهم او استخفافهم بتلك القبيله او ذلك الجنس .. فلا داعي لان نشعر الناس بذلك وان لا نبحر في شئ اصلا خارج تفكيرنا .. والحمد لله منتدانا منتدى مشهود له شهاده كل اعضائه وزواره بانه منتدي جامع لكل الناس وهو ليس حكرا علي اهل مدني وحدهم فقد جمع كل السودلن..
فدعونا نستمتع بكل ما هو جميل .. ودعونا نستمتع بهلوسات مهيره وهضربات اميمه وهترشات فيفد ...

[vivid]

تحياتي اخوتي هذا تعليق كنت قد كتبته في قسم المشرفين بخصوص قصه فيفيد ردا على بوست ود الماحي ... هذا رأي شخصي يرجع لي واختلاف الرأي حتما لا يفسد للاخوه اي قضيه ... تقبلوه بصدر رحب فقد اكون مختلفه مع البعض منكم هنا حول الصياغه الادبيه حينما تندرج تحت الخروج عن النص بمعني ان نأتي بأناس نستهزئ بهم فقط لنخرج بنص ادبي مضحك ...

اليكم رأيي بصراحه ,,,,,,,,,

اختلف معك ود الماحي اختلف معك جدا اتدري لماذا لا يوجد مصوغ ابدا يدعنا نترك لاي قلم ان يدعي الابداع الادبي فوق رفات اشياء مهمه لو تم حذف نصف هذه القصص لن تؤثر ابدا في الصياغ الادبي لان ما بها ثرثره وصفيه لا تدخل في متن القصه ولا تؤثر في بنائها فلماذا اذن بينما نحاول الابداع نجرف في طريقنا اشياء اهم بكثير من كوننا نكتب ... فيفد قد يكون راوي قصصي جيد جدا ولكن هذه الانزلاقات والخروج عن النص الادبي الملتزم هو ما يستدعي المقص تلقائيا لاجتثاثه نحن لا نريد ان نضحك ونقهقه فوق احداث سرديه تضر بالاخرين ايا كانو وكيف كانو دعونا نلتفت لهذا الجزء جيدا فنحن نجلس في مقهي ادبي كبير جدا لا يمكن ان نسمح بدخول كل ما هو مبتذل بحجه ان هذا شئ معاش او غيره فما كل ما هو معاش يكون صالحا لنقله هنا ...

وسأنقل لفيفد نفس وجهه النظر هذه ... هنا نبدع ونثور من ضجه الالق وتنبت لنا ايادي ثالثه ورابعه لنكتب بها كل ما هو جميييييييييييل وانيق ...




أميمة


جاييك

أخوك مزنوق شغل اليومين ديل ..

[Jamal Elmahi]

يا ريت يا شباب نقدنا للموضوع يكون هادف وبنّاء...وما نقلبو لمهاترات فكلنا أخوه وأسره واحده رغم أختلاف أزواقنا...
نرجع لموضوع فيفيد الجاب لينا الهبايب دا...والباب البجيب الريح لما يجيب مواضيع من فيفد بفتحو ذياده عشان أستريح ...والمابعجبو الموضوع يسد الباب ويستريح...من غير ما يدخّل في الموضوع عنصريه وسياسه والذي منو...
الموضوع سرد لواقع معاش كان رضينا كان أبينا...والنوبه أهلنا وجزأ مننا...وكلام فيفد لاشئ مقارنة بكلام فيليب غبوش أحد زعماء النوبه عن النوبه...وهو مش كلام بس أنما نبذ عديل ياحراميه يا مكوجيه يا خدامين يا...ومعظم نقاد النوبه أشاد بهذا الكلام بأعتباره دافع لتطورهم ...ثم النوبه قبائل عريقه ومتعدده وحتي الان عند بعض القبائل السرقه رجاله ولو عجبتك بت وداير تعرسا لازم تسرقا وتطفش بيها وكان أهلا قبضوك قبال ما تلد منك الله معاك ويومك أسود ذي السكن لكن لو ولدت منك تجي راجع وراسك مرفوع والكمبلا ما تديك الدرب...
الخلاصه كل واحد فينا ممكن يفسر الموضوع حسب أستقبالك ليهو أقصي الشمال بأنو عنضري وأستهزاء أو أقصي اليمين أنه واقع معاش وسرد جميل وطريف و البعض بكون بين الاتنين...
ألاهم في الموضوع لابد أن نرقي لمستوي الوعي لاحترام كل الاراء والازواق وأن يكون نقدنا للموضوع لا كأشخاص...وجمالنا في تنوعنا وأختلاف أزواقنا ...من كل روضه زهره ومن كل زهره عينه....هاكم الورده دي.....

ود الماحي

[sambaaa]

الاخ العزيز/ فيفيد ( عثمان ) ..

بقدر ما هو جميل ورائع سردك القصصي .. إلا أن أملي ان تتقبل النقد الادبي لنصوصك
فكما تعلم ان النقد ركيزة اساسية في الادب .. وبالنقد نجود العمل ونحرره في اجمل صورة ممكنة
وعليه وسع صدرك للنقد مما يعود بالنفع للجميع ..
وبكل صدق فالأخت / أميمة عشرية .. قامة ادبية يمكن ان يستفيد منها كل من خط نص ادبي في هذا المنتدى
وقد تكون هنالك مصطلحات في النقد نحسبها تجريح او تقليل من جودة النص .. لكن العكس صحيح تماما ..
لذلك املي ان تتقبل ملاحظات الاخت / أميمة .. وأن تناقشها في حدود النص ودون المساس بأشياء لا علاقة لها بالنص
فالكتابة في المنتدى ملك للجميع .. وللكل الحق في التعليق بما يراه داخل إطار الموضوع فقط .. وما يتعدى ذلك فهو غير مقبول..

أجدد ندائي لك بان تحول كل مشاركاتك لصوالين ادبية غنية بالجمال القصصي والنقد البناء .. تحت مظلة روح اخوية صادقة ..

ولك وافر شكري وامتناني ..

[vivid]

الجميلة جداً أميمة عشرية

أولاً شكراً على المداخلة الحلوة

ثانياً : تعودت في جميع مواضيعي التي أكتبها أن أنتقد الواقع السوداني بخيره و شره في قالب من كوميدي بلدي. و كذب من يقول ما كتبته في هذا البوست أو في بوستاتي السابقة مناقض للمجتماع السوداني. ان كل ما أقوم بكتابته في مواضيعي حقيقة لا ينكرها أحد و من أنكرها فكأنما يخادع نفسه.

مثلاً :

عندما كتبت جزء من صفات النوبة في هذا البوست

فقد تناولت كذلك قبيلة الجعليين التي أنتمي إليها بحلوها و شرها في مواضيع سابقة

و تناولت كذالك الجعليين و الشايقية و الحلفاويين.

آمل أن لا يجين واحد ناطي و يقول لي هذا طعن و سب في جزء من شخصية الشخص السوداني.

فالنوبة مثلاً مشهورين بصناعة العرقي و خاصة المريسة

كما نجد أن الجنس يحتل مكانة لا بأس بها في مجتمعهم الذي تسيطر عليه العقلية النسائية

و أنا لا ألومهم على ذلك فهذا جزء من واقعهم المعاش

و نجد أيضاً أن المرأة النوباوية تعمل بجد في النفقة على البيت النوباوي (في كثير من الحالات)

بينما يستكين رجالهم في السعي وراء الملازات الجنسية (مع غيرهم من بنات جنسهم)

و كذلك الملذات الفيزيائية من مصارعة و عراك.

لا أحد ينكر ذلك



مثال آخر :

كان لي صديق في المرحلة الابتدائية

و كان متعوداً أن يدخل للفصل من خلال الشباك

و كلنا كنا لا نتجرأ من الدخول من الشباك خوفاً من بطش الأستاذ

و كان ذلك اليوم

عندما دخل صديقي الفصل عن طريق الشباك

فوجد الأستاذ أمامه و في يده سوط عنج (قدر الليلة و بكرة)

فما كان من صديقي إلا أن رفع صوته عالياً

(يا أستاذ و الله دا ما أنا)

فما كان من الأستاذ و نحن الطلاب إلا أن ننفجر ضاحكين



بعد دا ما عندي حاجة أقولها ليكم أكتر من كدا

[zoolfrda]

يا فيفيد


(يا أستاذ و الله دا ما أنا)


هههههههههه

وأنا زاتي ما عندي حاجة أقولا ليك أكتر من كده

الله يديك العافية

[نور العيون]

غايتو يا فيفيد انا مت من الضحك من الضحك على الهترشات دي غايتو الله يديك العافيه انا امي جات وقالت لي مالك يا نور بتضحكي براكي زي المجنونه و الله كلام عجيب بس الله يديك العافيه

[vivid]

يا زول يا فردة

يا نور العيون

تسلموا على المرور السريع

و جاييكم

و الزنقة حاصلة

بندخل المنتدى متاوقة بس

[اميمه عشريه]

تحياتي لا تحد فيفيد وشكرا لانك اهتممت بالرد علي بوستي المتواضع والمشاتر عن بوستات الناس ..

نرجع للب الموضوع هو ان شحنة الاحترام والتقدير بيننا هنا لا تجزئها ولا تقيدها اي اراء سواء موجبه اي ضمنيا مع ما كتب او سالبه عكس ما كتب وضده .. لنضع هذه قاعده وخارطه للطريق نهتدي بها في كل انماط تعاملنا النقدي تجاه ما نكتب
هذا اولا واخرا ومن ثم نبدأ بعد ان حمدنا الله واثنينا عليه وعلي جزيل افضاله بان متعنا بمعرفه اشخاص رائعون مثلكم ....

اريد ان اخوض معك غمار ما كتبت فما هو بهترشات تشفع لصاحبها بانها هترشات ونمضي بها كعابري سبيل دعني اسبر اغوارها معك ومع كل الاخوه هنا,,,, فأنت تكتب نص ادبي دارجي جميل من حيث الحبكه وقبلها الفكره تصوغه بشكل متسلسل لا غبار عليه ابدا ......ولكن يبقي السؤال المهم جدا هل معني ان يكون هناك واقع معاش وهذه هي صورته هل هذا مبرر لان ننقله .بحذافيره ( فنحن لسنا في نشره اخباريه ننقل فيها المجزره كما هي ) لالا نحنا بصدد ادب يزين ويزركش ويجمل ويحافظ على مصداقيته ....
وسؤال اخر يلح علي جدا هل يكون مفيدا الي حد كبير ان ننقل كل السلبيات من مجتمعنا ونصنع منها ادبا هزليا الا يكفي انها اكثر الاشياء سالبه عندنا فنقوم نحن هنا ببث الحياه فيها واعادتها مره اخري لتصبح خطا ادبيا ونفتح المجال امام هذا ليصوغ قصه عن الجعليين والاخر عن الشوايقه والثالث عن النوبه الخ الخ ونقلل من قدرهم ادبيا بشكل اعتبره حقا جارح ولا يدخل في ادبيات العمل الفكري ابدا وامعانا منا في ذياده فاعليه التجريد لفئات بشريه نعريها ونظهر عيوبها بشكل لافت عكفوا سنين في ان يخفوها عن الانظار ويحاولوا مداواتها ونحن هنا نحاول ان نفسد اكثر مما افسده الدهر وفيفد معا !! وعبثا نحاول بخجل اصلاحه ..هل وانت بهذا الكم الهائل من الاحساس الادبي لا يمكنك ان تسرد قصصك بدون ان نقفز فوق اسوار لم توضع عبثا لا لا اظن ذلك فسياق موضوعاتك كلها يمكن ان تحافظ على نكهتها التي صبغتها بها لو تخليت قليلا عن بعض التعنصر الادبي واللفظي غيرالمتعمد والذي تستخدمه بحكم العاده .. وكثيرون منا يقومون بأشياء اقل ما يقال عنها انها خاطئه لا لجهلم بأنها كذلك بل بحكم التعود وقيل ان الالفه تذهب الشعور اي انك اذا الفت شئيا لم يعد هناك ما يلفت نظرك اليه ولا تجهد نفسك عناء تتبعه لتكتشف خطأه ام لا ... تخيل معي امرا واحد لو ان احد ابناء هولاء القبائل مر هنا في واجهتنا الادبيه التي تعرف بالمنتدي العام والقي نظره خاطفه ليجد هناك من يرسم اشخاصا هم اهله وعشيرته بشكل كاريكاتيري يضحك الناس هل تخيلت معي احساسه ؟ هل تبين معي شعوره .. ؟ انا عندما انتقدت هذا النوع من الكتابه ليس من منطلق ادبي فقط ولكن من منطق شعوري ايضا حاولت ان ارتقي بروحي واضعها في امكنه كثيره لو كنت كذلك ( محل هؤلاء الكاريكتارز الشخوص ) اقول في ذاتي لن ارضي ويبقي في قلبي شئ من حتي ..وشئ من غصه .... لذلك هذا هو الادب الذي يجب ان ينقد دون ان نعلل لانفسنا الاسباب بقول : لا تحملوا الموضوع اكثر مما يجب ... او دعونا نحترم اذواق الاخرين .. كيف ندعوا لاحترام اذواق الاخرين بينما نحن نمرر سكينا (ندعوها مجازا بالقلم) ممتلئة بالحبر علي فئات من مجتمعنا نحقرهم بكلماتنا ..
فقط لانه واقع معاش ,,,( اوهم اصلا متعودين علي كده ) هل هذا مبرر ؟؟ لا يا فيفيد اري ان الادب بكل فروعه التي صنفتها البشريه من قديم الزمن لا يعتبرا ادبا سويا لو تطاول على الاخر وذمه بأي صوره كانت هذه المذمه فلا قدح هنا حتي لا يؤخذ عليك نقطه ضعف فيما تكتب .. وقد رأيت اديبنا الطيب صالح رغم ان العالم صفق له الا ان هناك دائما نقطه ضعف يعيبها عليه النقاد ( اصبحت كشوكه في خاصره ادبه ) كان يمكنه ان يتفادها ويظل اديبا بقامته هذه او اطول قليلا ...هذا الضعف يكمن في تجاوزه الجرئ واجزم لك انه في حالات خلوه مع نفسه اكيد انه سيسأل نفسه ماذا لو انني مثلا لم اذكر هذه العباره هل متن القصه سيتهاوي او ان الركاكه ستصيبها وسيجد جوابا لم يكن يرغب ابدا في ايجاده ابدا ...!! فدائما التفكير في الرأي المضاد علامه صحيه جدا ..

فيفيد لك الود الاخوي الصادق على تحملك اياي وسعه صدرك التي تميز روح الاديب الممتلئ حد حافته ادبا وذوقا وجمالا
شكرا وشكرا لجميع من ساهم في اغناء هذا البوست .. بمداخلته التي اثرت معنا روح القصه ..