الحســـاب... ولـــــد.....

[نزار حسن محمد]

[size=4]الحساب...ولد ... اخونى الاعزاء ... الى متى هذا الصمت .... الموضوع ببساطه ... كل مايحضر واحد من السودان ...اجى محبط وشايل هم وقرار بعدم الرجوع ..ياخونا صاح بنسمع بانه فى تغير فى الشارع السودانى من نظافه لى تغير بعض الشوارع واضاءت بعض الاحياء وعمل منتزهات جديده ... طيب دا كله كلام كويس
لكن البنى ادم الانسان السودانى الصابر صبر ايوب متين حنسمع انه ارتاح وعايش عيشه كريمه وتعالوا نتحاسب بى واحد + واحد = اتنين
تعرفوا يااخونا كــــل مايصبح صباح على بلدى يعنى من طلوع الشمس بكون دخل للخزينه بتاعة الدوله مليــــــون دولار....
السودان بنتج يوميا 3000000 برميل بترول × 70 دولار= 2100 مليون دولار الشركات المنتجه بتاخد 1.50 مليون دولار الباقى بتاخد حكومة الجنوب نصف وحكومة الشمال نصف بمعنى نصف مليون دولار يوميا للشمال ونصف مليون دولار للجنوب المجموع مليون دولار ناخد مثال شمال السودان فى الشهر بكون عنده 15 مليون دولار يعنى فى السنه 180 مليون دولار والجنوب نفس الشى وسلفاكير استلم قبل فتره 700 مليون دولار باقى القسمه ...
طيب ياخونا لو نحن يوميا دخلنا مليون دولار وهذا فقط من نعمة البترول خلى باقى الاشياء !!! ياناس متين حنسمع بان الانسان السودانى
عايش ومامحتاج انه اترك بلده .. ماخلاص كفايه ... كفايه ..... كفايه .... كفايه ...كفــــــــــــــــــــــــــــــــــــايه

[elfatih61]

يا أخوى نزار ود حسن 00 تمشى الخرطوم بتشعر بالتغييــر الواضح في مظاهر الحياة المختلفة وبتشعر إنو في حاجة
جديدة بتتعمل 00 لكن برضو ما بالمستوى المطلوب 00 بينى وبينك الناس هناك ما بتشتغل 00 شوف السودان دا ما بتصلح
لو ما إنتهت حاجة أسمها ( الجماعة مشوا الفطــــــــــــــــــــور ) 00 بمعنى أخر يكون في ضبط وربط في دوواين ومرافق
الحكومة 00 الفطور 00 ولا المصيبة الكبيرة لمن الوزارة ولا القسم كلوا يطلع بعربات الحكومة عشان عندهم زميلهم
وزميلتهم بت خالت جدتها ماتت ولا جار خال ود عمة المدير حصل ليه حادث ويضيعوا ثلاث ساعات في الزيارة دى والعجب
لو كان وقت فطور 000 ااااه آنسى ياعم وما يهم الناس المراجعين ينتظروا ولا يجوا بكره 00

أما لو طلعت من الخرطوم 00 وشقيت شويه في الاقاليم دى تشوف العجب العجاب !!!

عايزين صحوة ضميــر يا ناس 000 بلدنا خيرها كثيــر 0 بس 00 بس ولا مافي داعـي كلكم عارفيـن !!

أخوكم /الفاتح/

[DANY]

فعلا كفايه00ونص يا نزار !!!!!

[ابومرام]

لك التحية اخي نزار احيك على هذا الموضوع وانت دائما نتاقش مواضيع في غاية الاهمية لكن على من تنادي والله الحال اصبح يرثا عليه وكما قلت الواحد عندما يعود من السودان يقرر عدم الرجعة او الشي الثاني ناس السودان نفسهم تفكر انك تستغر يقولوا ليك عملت شي لو ما عندك حاجة ما تجي ماعارف الناس دي دخلت في حالة ذهول مروع والخوف امتلكهم والشي الثالث والاهم هو موضوع الرشوة (التسهيلات) كما يسمونها نعل الله الراشي والمرتشي تذكر اخي الحبيب اللعنه من الله فهل ترضى لنفسك ان تكون من الملعونين : الحاصل شنو يا جماعة الى متى في هذه الحالة هل الوضع سوف يطول ام الانتظار ينتهى نسال الله ان يزلل كل العصاب وان يفتح علينا بنعمة من عندة،،،،،،
ملحوظة : اخي نزار والله مقصر معاك كثيراً نسبتاً لظروف العمل لك اعدك واعد نفسي

[عمك تنقو]

قلنا الروب عديل يانزار نسوي شنو ديل حيروا امريكا لما نحنا ؟
بلد العجائب
كل السنين الفاتت دي وفي هذا الموسم بالذات صفيحة الطماطم تفوق السبعين الف جنيه
واحد جاي من السودان امبارح
اها الاحوال كيف ؟
والله السودان نار في الجو والاسعار
لكن الخضار رخيص
تصوروا صفيحة الطماطم بي 3 آلاف جنيه
طبعا ما بصدقوا مش كده
دي بلد العجايب والدولار الاسبوع الجاي بي 1800 جنيه
ماهية المغترب انقسمت النص !
ولا مقلبل في موازي السودان حتي تكون النسبة ثابتة
اجمل حاجة جنبي جيراني عمانيين جايين اجازة من السودان
سالتهم انتو في السفارة هناك ؟
قالوا لي ( لا )
نحن مغتربين هناك شغالين في البترول
( بلد العجايب ) !!!

[نزار حسن محمد]

الاحباب الاعزاء .... الفاتح
Dany
ابومــــــــــرام
عمك تنقـــــــــــو
لكم الود وانتم تحملون هم الوطن والمواطن .. لكن ياخونا ... هل نسكت(( لا )) اتمنى ان نرفع رايه الحساب .. والد.. لى اعلاء الجهات وهذا اضعف الايمان . المهم فى النهايه لازم يحسو بنا.. لن الكيل قد طفح .. ونحن وراءهم .. وراءهم واتمنى من الجميع ان يدلوا... بدلوه.. اقل حاجه نفطفط من الشايلونه فى قلوبنا.. وكان متنا نموت ونحن مرتاحين.

[امل حياتى]

والله اخوى نزار كلامك كله صحيح بس الرواتب الحكومية والجيش لاحسه كل ملايين الدولارات وانا ارجح عمل تعداد سكانى من جديد
لتقيم الدخل وعدد السكان والناتج القومى والمحلى وغيره من الاحصائيات
طبعا" لما يتعمل تعداد سكانى بيوضح عندنا الاتى
عدد السكان + سن البالغين فوق ال18 سنة وكذلك تحت ال18 بالتفصيل لكل عمر على حدى
ثانيا" بيوضح عندنا الناس الشغاله فى الحكومه كم والاعمال الحرفية كم والصناعية كم والفنية كم والطب كم والمغتربين كم ونشوف العجز وين وبنغطيه
ثالثا" برضو بيدينا عدد الطلاب كم والاطفال وكبيرى السن كم وعدد الوفيات كم والموجود كم
بعد كل هذه النتائج بنعرف نصرف الملاين دى فين بالضبط
ونقدر نبنى خططنا المستقبلية لاكن من غير كده السودان حيفضل السودان زى ماهو ولا يزيد ولا ينقص حتى ولو مره عليه 100 سنه
ونطلب من الجهات الرسمية النظر فى الموضوع
لان ممكن من سياسة الدولة تتحكم فى كل شىء بمجرد ملء استمارة التعداد السكانى وتكون شاملة كل شىء
مثال ممكن نستطيع استخراج عدد افراد قبائل السودان الوفيات الاعمار - الناس الموجودة - الخارج السودان ممكن كمان بتحديد الدول
اى كل دولة على حدى - المتجنسين عدد السيارات عدد المنازل المشغولة الخالية الاجانب والوافدين عدد السيارات المتجوزين - والغير متجوزين - العوانس 0000000000000 الخ
ولازم تكون الاستمارة شامله كاملة كل شى ء يخطر على البال يعنى مثلا" استهلاك الكهرباء اسرة تستهلك شهريا" كهرباء تتراوح بين 40 الف الى 50 الف فى الحالة دى هيئة الكهرباء ممكن تعرف دخلها السنوى كم بمجرد دخولها على الكمبيوتر فى اقل من دقيقة بوضوح النتيجة ممكن ان تنظر بأمكانها استيراد مولدات جديدة ومتطورة
يعنى انا فى نظرى ممكن السودان يتتطور بس بمجرد ادخال بيانات استمارة التعداد السكانى شاملة وكاملة فى جهاز كمبيوتر وربطه بشبكة فى جميع دواوين الدولة والموضوع ينتهى .
ممكن نعرف برضو الناس المريضه مثلا بالسكرى والضغط والسرطان 00000000 الخ ونوفر العلاج اللازم لدرجة لو عايزين نعرف بنستهلك كام معلقة سكر فى اليوم بنعرف بس بمجرد وزن المعلقة فى الميزان بتساوى كم جرام والباقى حساب
عندى كام اسرة وعدد الافراد ونعمل احتياطى كم طن سكر يمكن فى ناس شربو عصائر او عملوا حلويات ههههههههههه


ومن هنا نستطيع ان نبنى اقتصادنا نستهلك مثلا فى العام كم جوال قمح كم جوال سكر ونصدر كم 00000000000 الخ
مشكور اخوى نزار يعطيك الف عافية على لموضوع الرائع ونتمنى من الجهات المسئولة النظر فى الموضوع

[نزار حسن محمد]

يسلام عليك .. يامل حياتى والله كلامك جميل جدا... وبصراحه ماكنت متصور انك فى المواضيع الجاده جاد بهذا المستوى ياخى ماديرنك تغيب عن هذا الموضوع ودايرين افكارك تصل لارض الواقع... ولك الف تحيه ..ومليون تعظيم سلام.

[امل حياتى]

مثال بسيط يا اخى نزار مثلا" طبعا" يجب الاستمارة تكون شاملة كاملة كل شىء يعنى عايز اعرف على سبيل المثال المدخنيين كم وبيستهلك كم سجارة فى اليوم

مثال فى احد الاستمارات موجود 2 مدخنيين فى الاسرة بيستهلكوا 40 سجارة فى اليوم واحد بيدخن 20 سجارة والثانى 10 سجارات
من نوع برنجى
فى الحالة دى مصنع حجار ممكن يعرف ان ينتج كم كرتونه فى خلال العام بس بمجرد دخوله على شبكة التعداد السكانى المدخله مسبقا"
وانا اردت طرح هذا المثال لانى اعتقد من اتفه الاسئلة تكون مدونه فى استمارة التعداد مع مراعاة المواليد والفيات كل يوم اى لابد من المستشفيات اضافة المولود او المتوفى على الشبكة بمجرد تحرير شهادة الوفاة او الميلاد لاكى لايحصل مشاكل فى المستقبل
كذلك دواوين الحكومة الاخرى فى تعين موظف لابد من تعديل بياناته من طالب لموظف 00000000000الخ

[خالد هاشم علي]

أخي نزار...لك التحية والاحترام...
احكي ليك وللاعضاء الكرام قصة حقيقية حصلت من فترة بسيطة 0(هي فضيحة) ولمن تسمعوها بتعرفوا قروش البترول بتمشي وين وهل حيجي يوم نجني ثمار البترول.

انا ح احكي القصة بدون ذكر الأسماء...
إبن مسئول كبير بالجزب الحاكم متزوج من إبنة وزير سابق في حكومة سابقة وشاءت الظروف أن ينتقل هذا الابن بزوجته للعيش بلندن لظروف ما.
المهم فجأة توفي الابن ( الزوج ) إثر علة لم تمهلة طويلا... وكان برفقتهم والدة الزوجة وهي ايضا تنحدر من أحدي العائلات الكبيرة في السودان.
أثناء ترتيب امور العزاء والوفاة والبحث في الاوراق حصلت والدة الزوجة علي مستندات تفيد بأن زوج إبنتها يمتلك في أحد بنوك لندن مايزيد عن 50مليون جنيه أسترليني :eek:
قامت بالاتصال بوالده المسئول الكبير بالحزب وبلغته بخبر الوفاة وبأنها حصلت علي مستندات تفيد بأن إبنتها قد ورثت مبلغ يتجواز مليون جنيه أسترليني( لديها إبن من هذا الزوج).
فجع المسئول بخبر هذا الإكتشاف وهذة الفضيحة أكثر من فاجعته في إبنه.... وبقي يتوسل لوالدة الزوجة أن تعيد هذا المبلغ إليه لأنه هو من قام بتحويل هذا المبلغ إلي حساب إبنه المتوفي ( وأن هذا المبلغ يخص الحزب).
طبعا والدة الزوجة رفضت تماما وبعد جرسة شديدة من المسئول الكبير( وعليك النبي... انا يتيم ومسكين.... وابوي ميت... وبيتنا ناصية وتدخل الأجاويد ) اقتنعت والدة الزوجة ورجعت ليهو نصف المبلغ فقط وورثت هي وإبنتها باقي المبلغ.
عرفت يانزار إنو مامكن يجي يوم نستفيد من عائدات السودان....؟؟؟؟؟؟؟؟؟؟؟؟؟
الله في

[HAMADTO]

المحافظة على الملكية العامة تربية وثقافة منذ الصغر إلى أن تصبح ممارسة يومية ...

يعني يا نزار يا خوي الناس ديل كلنا عارفين مويةٌ شنو ... عشان كده الموضوع ده كأننا بنأذن في مالطة

واقول ليك حكاية تانية بجانب حكاية ابوهاشم عشان تعرف قروش البترول بتمشي وين

قالوا مره من المرات مسؤول منشق من حزبه وانضم للحزب الحاكم قابل مسؤول حكومي
وسأله: انتو قروش البترول دي بتودوها وين ؟
المسؤول الحكومي قال ليهو: بنشتري بيها الزيك ...

ياربي حسي بكونوا اشتروا كم راس كده ؟

ربنا يديك العافية يا نزار واحيك على هذا الموضوع واتمنى من الله عزوجل أن ننعم بالسلام والبترول واضم صوتي لاصواتكم .... وخلاص كفاية

[HaSsOoN]

في البدايه اخوي نزار يديك العافيه والموضوع دا ما من الليله او امس دا من زمن الاستقلال والحكومات تمشي وتجي تدوس في المواطن السوداني المسكين البتلاقيهو شغال طول اليوم وفي النهايه بتلاقيهو يستلم بضع جنيهات اكل ساي مابتكفيهو ونحنا كل مره نعشم في نفسنا السودان حيتصلح السودان حيتصلح لاكن للاسف ماشي للاسوء والفساد مدمر البلد ودا الشي الما مخلي السودان يتقدم والسودان لو من بدري استغلت مواردو بالصوره الصاح واللهي كان بقا من الدول الكبرى والناس عايشه احسن عيشه بس للاسف الميزانيات الكل مره بنسمع عنها بتمشي وين مابتعرف وصحي في تطور حاصل لاكن على مستويات محدوده جدا لو قارناهو بمساحات وعدد سكان السودان مابعمل 1% لاكن نسئل الله انو يحفظ السودان ويكفيه شر المصائب والموضوع دا داير ليهو كلام كتير وانا اختصرتو في الكلامات دي ......ودمت لنا اخوي نزار وكلنا غيورين على بلدنا ونتمنى نشوف في مصاف الدول الكبرى ان شاء الله ...وعذرا على الاطاله

[أبوبكرحامد]

الحكومة الحالية لاتعير إهتماماً لأى أصوات غير أصوات البنادق ، لهفى على السودان وقد تناوشته النزعات القبلية فى ظل حكومة همها الأول والأوحد البقاء فى السلطة ، ولامانع لديها من اقتسام السلطة والثروة فقط أحمل سلاحاً وخاطب الأمم المتحدة والمجتمع الدولى لإنصافك من ظلم ذوى القربى .

[نزار حسن محمد]

اخـــــــــــــــوانى .. واهــــــــــــلى .. لكم كل الحب والتجلاء على مدخلتكم التى تنفس عنا بما يجيش بالخاطر من لوعه..

اخى خالد هاشم على .. اعطيك الصحه والعافيه ومشكور كتير على سرد هذا الواقع الاليم .. واتمنى ان يعلم الجميع
بما يحصل فى الوطن!!!!!!

حبيبنا المعلم حمدتــــــــــــــو ... والله ذى ماقلت اسع بكون اشترو كم راس ...خوفى على جيل الغــد .. لكن ماحنسكت.
يانبيل بس انت واصل فى هترشات .. والهترشات.... الجو ....الجـــــــــــو...

الغــــــــالى حســـــــــــــــــون... مشكور ياغالى ودايرك تطـــيل فى الحديث وتكشف المستور و لو ماعملنه كده صدقنى
ما حنتقـــدم ولا خطــــــــوه .. لك ودى

الاستــــــــــــــــــاذ ابــــــــوبكر... لك الود وانت تدخل فى صميم الموضــــوع ..ولكن ياود الماذون ثـــــــورة اكتوبر
ما بعيده عن الاذهان... واهل الحقوق والقانون .. كانوا فى طليعة اكتــــوبر عبر
الصحف ... والشارع .... ونحن منتظرين .. ودمتم

[الجندي المجهول]

فعلا كفايه00ونص يا نزار !!!!!
الحكومة لو ما غيرت سياسة الصرف البزخي والفواتير الوهمية والخرافية دي حال المواطن ما بينعدل يعني بصريح العبارة الناس تبطل سرقة لان الدخل الموضح اعلاه كفيل بحرية ومجانية التعليم والعلاج وديل كان اتحققوا الباقي هين ولك روحي يا سودان ونسال الله ان يزيل عن السودان كل المحن والمصائب وان يرد كيد الخائنين " انا قصدي بالخيانة هنا الناس البتسرق قوت هذا الشعب المسكين المكافح البقي كلوا مغتربين وما هنت يا سوداننا يوما علينا

[نزار حسن محمد]

>>... العزيز العالى جندينا المجهول ايسمع منك ربنا والحال انعدل بعد الحال.. لكن بينى وبينك بالشايفنه ده ماظنيت .. والجماعه ديل مابشبعو بالساهل..

اريتم بسم الفار.. ال مايخلى فوقم نفخة النار

[zoolfrda]

مشاركة من أخونا الأستاذ/ وليد حسين
elkont50@yahoo.com

الفساد أنواع ...

بعد صدور التقييم الدولي من قبل (منظمة الدولية للشفافية) وعبور السودان المرتبة
166 على المستوى العربي والدولي والتفوق الملحوظ على كل نظرائها العرب والأفارقة
حتى العراق الذي تزار فيه الحرب الضروس كان لابد من وقفه .....
الفساد له أوجه عديدة منها الفساد المالي والفساد الادارى ويعد الفساد السياسي
واحدا من أهم أوجه الفساد على الإطلاق وهو بوابة العبور إلى جميع أنواع الفساد
الأخرى لكن الأثر الاقتصادي يظهر بصورة أوسع في النوعين الأولين .... وتعتبر الرشوة
أهم تعبير عن الفساد المالي و الرشوة تدخل في كل أنواع الأعمال الإدارية والأعمال
الخدمية ويظهر أثرها سريعا وحول العالم هنالك جمعيات ومنظمات أخذت على عاتقها
محاربة الرشوة والحد من هذه الظاهرة . وفى العالم العربي تقترن الرشوة بالفساد في
شكلين (الفساد الكبير) و(الفساد الصغير ) وبداء من الصفقات الصغيرة إلى التلاعب
بالمال العام ومنع الرخص إلى شراء السلاح إلى توفير الخدمات الإدارية وتسريعها إلى
شراء المناصب المرموقة في إدارات الشركات وتسيير الموارد البشرية . ولعل أكثر ما
يضعف موارد الحكومات الفساد المتعلق بمنح الصفقات خارج حدود المنافسة فهو يؤثر
مباشرة في الإنفاق العام . ولعل الشرعية التي أخذتها الرشوة في السنوات الأخيرة
نابعة من الثقافة الشعبية التي جعلتها من أهم ملامح الدول النامية . ومن الأوجه
الأخرى للفساد المالي التهرب من الضرائب وأعنى هنا تهرب الأفراد والمؤسسات من دفع
الضرائب وإخفاء أرباحهم التي دائما تكون من الأعمال الغير شرعية أو بإعطاء أرقام
غير حقيقة وهو الأكثر شيوعا , وهذا التهرب الضرئبى يؤدى إلى تغذية راس المال ( في
الاقتصاد الموازى ) وتراكمه مما يجعل من الصعب على الحكومات إن تغذى خزائنها من هذا
الاستثمار , والى جانب التهرب الضرئبى هنالك التهرب الجمركي وإبطاله من كبار رجال
ألدوله والعاملين في الجمارك وبعض المحسوبين والمعاونين لهم والبنك الدولي يضع
الفساد الجمركي في المراتب الأولى للفساد الأكبر ولآثاره على مستوى الدخل والأسعار
وإيرادات الدولة وعلى المنافسة الشريفة في السوق اى المنافسة الكاملة ( حصول
المتعاملين في السوق على المزايا نفسها وان لا تكون هنالك حواجز غير اقتصادية إمام
البعض ) , ويعتبر التبذير في النفاق العام من الكوارث على كاهل الدولة النامية فهو
يؤثر على الاقتصاد إن كان موجه أو اقتصاد سوق حر فالآثار المترتبة عليه إنهاك
المخزون الاستراتيجي للدولة وظهور طبقة من المختلسين من كبار رجال الدولة وخاصة في
الجيش والشرطة باعتبار هما المضخمين الأساسيين لفواتير العتاد العسكري التي تصل إلى
المليارات من الدولارات وهو اكبر أنفاق للدولة النامية , وتأتى عملية الخصخصة في
المرتبة الثانية من حيث إنهاكها للمخزون الاسترايجى للدولة النامية فدخول الشركات
والمؤسسات الصناعية لشراء أصول القطاع العام والكم الهائل من الرشاوى والذي وصل في
بعض الدول إلى 80 مليون دولار وهذه إحصائية للأمم المتحدة ( هذا المبلغ يساوى ما
تخصصه الأمم المتحدة لبرنامج محاربة الفقر ) واستفادة بعض رؤوس الأموال الغير
معلومة المصدر من طرح أصول القطاع العام للبيع لغسيل الأموال وتبيضها مما يؤثر سلبا
على اقتصاد الدولة , من هنا نجد إن كل أو جل هذه الإشكال للفساد أصبح موجودا في
السودان ولكي نحاول إن نجد حلول لهذه المشكلة التي تؤثر سلبا على الاقتصاد لابد من
حلها من جذورها بوضع قوانين تتحكم في الرشوة والفساد المالي والادارى ونخصص جهاز
للمحاسبة يتميز بالشفافية والحياد التام ولنجعل القانون هو السيد وألا فانهيار
الدولة قادم لامحا ل .......وكذلك للفساد أوجه عده وأثار اجتماعية وبيئة سأتطرق لها لاحقاً ........
و لكم مودتي

[السلامى]

تحية لك اخى الكريم عموما نحن تبرمجنا بالبلدى كده على الشغاوة والجرى وراء الاشياء والاوهام يعنى غاية طموحنا نأكل تفاح فى الشهر مرة واحدة لان الواحد فينا اصبح لايبالى بما يجرى فى هذا البلد من فوضى واختلاسات ورشاوى والعجب العجاب عدم حسم الامور من قبل أصحاب القرار على كل حال ( خليك فى الغربة لو كانت فيها السعادة ) واتركنا نباصر فى ايقاع هذه الحياة الرتيبة

[نزار حسن محمد]

الاحباب ... ذو الفـــــــــــرده .... سلامــــى
مشكور على هذا التوضيح العلمى للاستاذ وليد حسين ..والشكور موصول لشخصك الراقى على تنوير اهل المنتدى بهذا المقال

العزير جدا جدا السلامــــــــــى
ياخى نحن ماديرين نعيش معكم الحلوه والمره وصدقنى يالسلامى مهما كانت الرفاهيه فى بلاد الغربه لاتعادل جلسة ونسه مع الحبان
بعدين ياخى نحن ماديرين نستسلم البلد ماحقت كل السودانين ومهما كثرة الضغوط والمعاناه لابد لليل ان ينجلى ..ويدك وايدى بنعدل الاعوج
كان بالمنطق... و لا كان بالقـــوه ... وحواء السودانيه .. بتــــول بالرجال ..وفى ساعة الحاره مابنقدره .. لك ودى عزيزى السلامى

[اميمه عشريه]

السودان كبلد يا نزار يحتاج بلد ,,,,يحتاج اناس منصفه وقياده حكيمه وايدي عامله .... هميمه وحريصه على رفعته ...

[نزار حسن محمد]

الاخت اميمه ... لك الشكر على المشاركه وياخيتى الحاصل من نهب وسلب.. ده الواجعنا .. اما من ناحية البلد صدقينى بتنعدل وفى رجال ونساء يعدله الما بنعدل ويكفنا فاخرا السودانين بالمهجر عملوا وعمره بلاد... وبلاد .. بس انتى اصبرى شويه وشفى البلد بتبقى كيف
ودائما حواء كانت وقود الثوره وماتنسى مهيره بت عبود وامثاله،،،،

[nasa]

الأخ نزار موضوعك كبير ناهيك عن الحكومة أو موضوع بترول موضوع شعب بأكمله تغيرت وتبدلت النفوس والضمائر يمكن ان تكون هناك مراجعات قانونية وحسابات ويمكن أن يصلح الحال؟ لكن كيف تراجع النفوس والضمائر والتفكك الأخلاقي نحتاج الى تربية نفس وحب وطن ورجوع الى الله أولاُ ومحاسبة النفس ! نعم هنالك تغيير واضح في تركيبة الشعب السوداني الى الاسوأ مع احترامي وحبي للشعب السوداني لكن للأسف هكذا أصبح واقعنا المرير أرجو حل أو إقتراح ؟

[نزار حسن محمد]

الأخ نزار موضوعك كبير ناهيك عن الحكومة أو موضوع بترول موضوع شعب بأكمله تغيرت وتبدلت النفوس والضمائر يمكن ان تكون هناك مراجعات قانونية وحسابات ويمكن أن يصلح الحال؟ لكن كيف تراجع النفوس والضمائر والتفكك الأخلاقي نحتاج الى تربية نفس وحب وطن ورجوع الى الله أولاُ ومحاسبة النفس ! نعم هنالك تغيير واضح في تركيبة الشعب السوداني الى الاسوأ مع احترامي وحبي للشعب السوداني لكن للأسف هكذا أصبح واقعنا المرير أرجو حل أو إقتراح ؟

الاخ nasa... فعلا ياخى النفوس والضمائر والتفكك الاخلاقى.دى مصيبه حلت علينا.. وياريت لو كانت داخل السودان وبس طرف السوط وصل بلاد الاغترب.كان فى السابق سمعت السودانى ذى الدهب لكن الان بقينا نخجل من اشياء كثيره اولها الاقرازت الحاصله داخل المجتمع السودانى من تفكك اخلاقى ..وبرضو برجع السبب لى ولاة الامر.. والله المستعان

[عزيز عيسى]

شمال السودان فى الشهر بكون عنده 15 مليون دولار يعنى فى السنه 180 مليون دولار والجنوب نفس الشى وسلفاكير استلم قبل فتره 700 مليون دولار باقى القسمه ...
سلامات يا نزار،

إنت يا أخوي حسبت لغاية ماطلع الدخل في السنة 180 دولار..
زي ما قلت الحساب ولد والمبلغ بالدولار أنا عايزك تواصل وتشوف لي
التعداد السكاني في السودان أصبح كم علشان تقدر تقسم الدخل
على الجميع وكل واحد يأخذ حقه كاملا..
أنا غايتو حأفتح لي حساب في واحد من البنوك في السودان
وفي آخر السنة حأطالب بحقي على داير المليم..
حالة يرثى لها.. والشكية لغير الله مذلة..
صدقني الله دائما مع الناس الغلابة..
وهي مسألة وقت فقط..
وفي النهاية الخير سينتصر على الشر.

[راشد خضر]

[size=4] نأخذ مثال شمال السودان فى الشهر بكون عنده 15 مليون دولار يعنى فى السنه 180 مليون دولار ...
عييييك الكترااابه يانزار علي الأيمان أهلنا الرباطاب تقتلم وجعه ساي كان سمعوا كلامك دا . . وكان طلعوا فية نكات
ديل للآن يطارد فيهم البنك الزراعي بواسطة الشرطة لعدم مقدرتهم علي سداد السلف الزراعية . وذلك نسبة لكساد الموسم واصابتهِ بالآفات ..

[نزار حسن محمد]

سلامات يا نزار،

إنت يا أخوي حسبت لغاية ماطلع الدخل في السنة 180 دولار..
زي ما قلت الحساب ولد والمبلغ بالدولار أنا عايزك تواصل وتشوف لي
التعداد السكاني في السودان أصبح كم علشان تقدر تقسم الدخل
على الجميع وكل واحد يأخذ حقه كاملا..
أنا غايتو حأفتح لي حساب في واحد من البنوك في السودان
وفي آخر السنة حأطالب بحقي على داير المليم..
حالة يرثى لها.. والشكية لغير الله مذلة..
صدقني الله دائما مع الناس الغلابة..
وهي مسألة وقت فقط..
وفي النهاية الخير سينتصر على الشر.



الخواجه عزيز... التعداد السكانى تقريبا 35 مليون نسمه.

مشكلتك كبيره ياخواجه انت ناسى انك مطالب لى جنا جناك وكمان بالعمله الحره يعنى دولار او يروووووو

طيب نبداء الحساب اولا الضرائب 2/ الزكاة3/ خدمات4/ رسوم التجنيد 5/ تاشيرة 6/ رسوم المغادره

وكمان لو عملت الجواز الامريكى قطعة ارض مابدوك وتقول لى داير تفتح حساب (( حليلك))

[راشد خضر]

علقنا ليك يا نزار . . أرجع الصفحة ( 1 )

[نزار حسن محمد]

Size=4] عييييك الكترااابه يانزار علي الأيمان أهلنا الرباطاب تقتلم وجعه ساي كان سمعوا كلامك دا . . وكان طلعوا فية نكات
ديل للآن يطارد فيهم البنك الزراعي بواسطة الشرطة لعدم مقدرتهم علي سداد السلف الزراعية . وذلك نسبة لكساد الموسم واصابتهِ بالآفات ..
__________________ المشاركه بواسطة راشد خضر

العزيز راشد هلا بيك وبى اهلنا الربطاب ..تعرف ياراشد انا اشتغلت فتره فى مشروع الجزيره وعشت مع مشاكل اهلنا الغبوش وكلامك عن البنك الزراعى لى بكره وبعده حيطارد المزراعين وبعد شويه الموظفين والمواطنين وقالوا السودان سلة غذاء العالم ياخى شكيناهم لبيدا قويه الا نام ولا اكل الطعام...

[اكرم]

والله ياشيخ نزار نتمنى انو السودان ينصلح حالو بس كيف ينصلح والحكومه(......................................... )
عشان كده عمره ماينصلح ويرتاح الشعب الا اذا انصلح حال من على الكراسي .....لكن لنا رب اسمه الكريم ... والله المستعان

ودمتم ..

[نزار حسن محمد]

والله ياشيخ نزار نتمنى انو السودان ينصلح حالو بس كيف ينصلح والحكومه(......................................... )
عشان كده عمره ماينصلح ويرتاح الشعب الا اذا انصلح حال من على الكراسي .....لكن لنا رب اسمه الكريم ... والله المستعان

ودمتم ..


الاخ اكرم ... الحل الوحيد انه مانسكت نحن مادايرين اكتر من العيشه الكريمه للموطن السودانى وكفانا غربه وبهدله والناس الصبرين فى الداخل كفاهم
وجع ..واسم حدائق ابريل قاعد للتذكير..

[السلامى]

أنت ياخوى نزار حسابك دى كان لسه بالدولار يمكن مع نزول الدولار دى أمورنا تتصلح شويه ولاشنو عموما أنا محبط جدا لاننى ياخى أعمل فى ثلاثة أماكن يعنى من الرابعة صباحا الى الخامسة مساء تصور وبرضوا مصاريف الاولاد عامله لى شوشرة أعمل شنو ولا أقول ليك قووودوووونى الى النوووووووووووووووووور

[نزار حسن محمد]

الاخ العزيز السلامى... اولا ربنا يبارك ليك فى عيالك وفى قومتك من الفجر للمغرب... والله يالسلامى برغم كل ماذكرت لكن انت برضو فى نعيم وقول الحمدالله
وربنا يعدل الحال بعد الحال ... لكن تعال شوف اخوانك المعذبون فى بلاد الغربه..شى لايوصف ماتشوف المغتربين نازلين فى الاجازات قيافه وقشرين.يعلم الله
عشان يسده حق الاجازه حول باكمله والحال مابنعدل ..دى من ناحية الحسابات اما الناحيه النفسيه .. اخير اسكت ساى عشان ماتصدع .
وبرغم الحاصل برضو راجعين راجعين وناكله معاكم كسره بىمويه وتمر بلدى ولاتفاح الغربه.

[Jamal Elmahi]

الحساب...ولد ... اخونى الاعزاء ... السودان بنتج يوميا 3000000 برميل بترول × 70 دولار= 2100 مليون دولار الشركات المنتجه بتاخد 1.50 مليون دولار الباقى بتاخد حكومة الجنوب نصف وحكومة الشمال نصف بمعنى نصف مليون دولار يوميا للشمال ونصف مليون دولار للجنوب المجموع مليون دولار ناخد مثال شمال السودان فى الشهر بكون عنده 15 مليون دولار يعنى فى السنه 180 مليون دولار والجنوب نفس الشى وسلفاكير استلم قبل فتره 700 مليون دولار باقى القسمه ...
طيب ياخونا لو نحن يوميا دخلنا مليون دولار وهذا فقط من نعمة البترول خلى باقى الاشياء !!! ياناس متين حنسمع بان الانسان السودانى
عايش ومامحتاج انه اترك بلده .. ماخلاص كفايه ... كفايه ..... كفايه .... كفايه ...كفــــــــــــــــــــــــــــــــــــايه

[SIZE=6]قلته أأأبوي الحساب ولد...لكن حسابك دا أظنو بنيّه وكمان غلفه...راجع أأبوي حسابك وما تظلمنا...الشي أأأبوي كتير خلاص...
بجيك صاد للباقي...

ود الماحي

[راشد خضر]

العزيز راشد هلا بيك وبى اهلنا الرباطاب .. . .وقالوا السودان سلة غذاء العالم ياخى شكيناهم لبيدا قويه... [/SIZE][/COLOR]
هههه :p هههه واللّه يا نزار انت قديم قُدُم ، دعوتك دي ذكرتني حبوبتي الحِـميرا الله يرحمها .
مشكوور وربنا يفك الضيقه .

[نزار حسن محمد]

[QUOTE=Jamal Elmahi][SIZE=6]قلته أأأبوي الحساب ولد...لكن حسابك دا أظنو بنيّه وكمان غلفه...راجع أأبوي حسابك وما تظلمنا...الشي أأأبوي كتير خلاص...
بجيك صاد للباقي...

[COLOR=Sienna][SIZE=5] ود الماحي
افوه .. افوه ..ودالماحى أتا عشان يدك بارده ابوى جواز وجنسيه وكمان لاضرائب ولازكاه ولارسوم مغادره ...ياحليلنه من الباسبورت الكحلى ...

وبعدين..... انت الجابك بى هنا شنو انا ماكلمتك قولة ليك لمن تشرب السجم دا امشى غادى غادى واقعد مع ناس الدكان... ود الماذون مجبور اشيلك فوق كتفه لمن اوصلك البيت ... وكان للحساب غلط ابوى حسابك فى الدكان ختمه عليه بالشمع الاحمر...لو لاتدخل الاجاويد وبارك الله فى الخواجه
دق صدره ودفع الحساب... ودحسن

[elfatih61]

مع نــزول الدولار 000 وإستمرار الأسعار في السودان على حالها دون نــزول
الضحايا والمتضررون من ذلك هم
( المغتربوووووووووووووووووون ) !!!

[نزار حسن محمد]

مع نــزول الدولار 000 وإستمرار الأسعار في السودان على حالها دون نــزول
الضحايا والمتضررون من ذلك هم
( المغتربوووووووووووووووووون ) !!!

العزيز الغالى الفاتح ..فعلا ضرر كبير على المغتربون المشكله فى استمرار ارتفاع الاسعار ياخى دى حاجه تمخول فرحنا قولنا الدولار نزل معنا الوضع اتصلح شويه لكن تقول شنوه فى بلدنا صوره مقلوب!!!!!