حألف يمين مابنوم فى الخرطوم

[نزار حسن محمد]

حالف يمين مابنوم فى الخرطوم

هذه العباره كانت عاده فى ايامنا فى اوخر السبعنيات واوائل الثمانينات... وهى عاده التصقت بى شخصيا.. عدم المبيت فى الخرطوم مهما كانت الظروف لدرجة انى تركت معهد الموسيقى والمسرح ودخلت امتحان الشهاده للمره الثانيه وسافرت خارج السودان ودا كلوا عشان ماانوم فى الخرطوم ..
اذكر مره كانت عندى معاينه بالخرطوم وتم تاجيل المعاينه لليوم الثانى الساعه سابعه ونصف صباحا ..حاولت اضغط على نفسى وابيت لليوم الثانى لكن ماقدرت والساعه 12 بالليل ذهبت تفتيش سوبا وركبت من هناك عشان ماانوم فى الخرطوم واذكر وجدته صديقى عبد البديع الهندى وهو من ابناء الشكابه وله نفس الطبع رجعنا لمدنى وتانى يوم ركبنا بص الساعه خمسه ونص صباحا ودا كلوا عشان مانوم فى الخرطوم . وبالمناسبه هذه كانت عادة ناس مدنى ..يأخى عندما تصل الباقير وتلقى اليافطه المكتوب فيها مرحبا بكم فى والاية الجزيره تحس براحه عجيبه ... وهواء الجزيره البرود الروح ... وكانت لنا ايام ..

[أبوبكرحامد]

المدناوى الأصيل نزار ود حسن ...... كان هذا السلوك ديدن الكثيرين من أبناء مدنى ، وأذكر بصات فيكتورى التى تسير سفرية للخرطوم الساعة الرابعة والنصف صباحاً والأخرى عند الساعة الخامسة والثالثة عند السادسة صباحاً مما يسهل قضاء حوائجك فى الخرطوم والعودة لمدنى فى نفس اليوم .
أذكر أيام الدراسة بمصر ، وكنا نعود للسودان فى إجازتنا الصيفية ، وفى طريق العودة لمدنى تجدنى أراقب الطريق منذ خروج البص من الباقير ، وما أن أشاهد عربة تاكسى مدنى بلونها الأحمر حتى تسرى فى رعشة الشوق للقاء الأهل والأحبة ، وتجدنى أراقب الطريق بولع طفولى وكأنى اقبل حينها تراب مدنى عبر التحديق فى الأسفلت والفضاءات المطلة على الشارع.

[نزار حسن محمد]

الغالى ابوبكر حامد موسم الاجازات على الابواب وانا مسافر مدنى قريبا .. لامر هام يهم ناس مدنى اتمنى ان نلتقى فى مدنى ومانبيت فى الخرطوم.. لك ودى

[nasirib]

الاخ نزار حسن محمد لك التحايا
والله بمناسبة حلاف ماانوم في الخرطوم
في احدي اجازاتي كانت لدي بعض الاجراءات ولم تنتهي بعد وايضا واجب عزاء المهم تاخرت حتي منتصف الليل ولدي من الاعمام والخيلان والاصدقاء بالخرطوم بس نفسي ابت المبيت وذهبت بلوري حتي المسيد ونومت فيها وبعد صلاة الفجر رجعت الخرطوم مرة ثانية والله شئ محيرتماما
بك كل الود والامتنان

[HaSsOoN]

يديك العافيه اخوي نزار لاكن تعرف انا برضوا يوم امشي اجازه الخرطوم دي كان بالغت بقعد يومين لاكن انتا عارف بحس نفسي مخنوق وماقادر اتنفس وزي ماقلتا اخوي نزار الزول من يشوف اليافطه المكتوب فيها مرحبا بكم في ولاية الجزيره كدا الزول يادوب يتنفس ويحس بي راحه ....حتى انا في اجازتي الاخيره قبل 4 شهور جيت الخرطوم لي غرض ما فا اول مانزلت ركبت التكسي وطبعا زحمة الخرطوم وسخانتا ديك فاسواق التاكسي لاحظ فيني امو مضايق شديد فسئلني انتا من وين فقلتا ليهو من مدني .....فقام قال لي انتو ياناس الجزيره اصلوا مالاقاني زول فيكم برتاح او بحب يقعد في الخرطوم........فيا ياخوي نزار مش زمااان برضوا هسي حاصله ............. ومعليش على الاطاله........ودمتم يااحبتي الكرام

[مهيرة]

العزيز نزار

هي اسمها ارض المحنه واهلها الحنان واديك سر ناس مدني الباعوا بيوتهم وذهبوا للعاصمة
جو راجعين و الحسرة ماليها حدود لحنين الديار ورأيت بأم عيني كيف كانت بهدلتهم في
فنادق مدني بحثا عن الديار والعودة والعيشة وسط الاهل والاحباب

مدني الأسرة
الخرطوم التداخل

والفرق واضح

تسلم اخي نزار حسن

[نزار حسن محمد]

اختى العزيزه جدا الاستاذه مهيره اولا اشكرك على المرور ثانيا بشكرك على الموضيع الرائعه التى تطرحيها فى هذا المنتدى
ثالثا الله يطمئنك بهذا الخبر لانى بنيت بيتى بمدنى ارض المحنه ،،،،،،ولك الود اخوك نزار