|
امتداداً لسلسلة توثيق الصحافة
لنجوم الكرة في عصرها الذهبي حملنا اوراقنا حسب موعدنا المسبق والمضروب قبل شهر من
الآن واتجهنا الى حي الزمالك بمدينة ودمدني .. حيث يزور كابتن ابراهيم محمد علي
«ابراهومة سيد الاسم» وطنه الصغير مدني فكان ان استنطقناه بعد صمت طويل ليسرد
تاريخاً ناصعاً لنجم كروي ملأ الساحة ابداعاً وفناً فاحبته جماهير المريخ وجماهير
الكرة السودانية ، وما ان يتبادر اسمه الي الاذهان حتي يعود شريط المتوالية
المريخية امام الهلال .. ابراهومة اللاعب الوحيد الذي يكون حضوراً دائماً عند كل
لقاء قمة بوصفه من صناع الانجازالمريخي الذي تتفاخر به الجماهير المريخية .
استقبلنا في منزله وفتح لنا قلبه واسترجع معنا شريط الذكريات في حديث استمر لثلاث
ساعات فماذا قال ابراهومة.
اجراه :
مجتبي عبدالرحمن
معتصم عيدروس
ناس الاتحاد زعلوا
وقالوا لي ابوي امشي الحق الزول ده قبل ما يعلموا ليك الصعلكة
لم تشهر في وجهي بطاقات الحگام واندهشت لابني المطرود!!
سجلوني في الاتحاد ملح
وفي المريخ بي 150 جنيه!!
ود أزرق المحطة الأولي -:
كانت بدايتي بسيطة جداً كأي لاعب كرة قدم في تلك الفترة حيث لعبت في فرق
الحواري بود أزرق.. انتقلت بعدها لفريق الفجر وكانت الفرق وقتها مثل فرق الناشئين
الآن ولكنها غير منظمة بصورة رسمية مثل فرق الناشئين الآن والتي تتبع لرعاية
الناشئين ومعي مجموعة من اللاعبين المميزين في تلك الفترة.. قسم إدريس - مقبول
العجلاتي - حسين شلالي ومنير عوض الله.
- الانتقال للاتحاد -:
يقول إبراهومة الكبير.. في عام 1956م انتقلت لنادي الاتحاد مدني وقادني للتوقيع
فيه أبن عمي بهاء الدين بحيرى..- سجلوني ملح -
: عن حافز التسجيل في الاتحاد يقول إبراهومة ما كان في أي حافز وسجلوني ملح بدون أي
قروش... وجيت لعبت في الاتحاد ولقيت قدامي أحمد عشرية والرشيد أخوي ونصر الله موسي
وكرار والتوم ومحجوب سناري ومجموعة من اللاعبين.
- قعدت في الاحتياطي -:
يواصل إبراهومة حديثه ويقول أنا لما جيت الاتحاد كنت صغير فأجلسني المدرب في
كنبة الاحتياطي لحدي ما زهجت من كنبة الاحتياطي وكنت داير أمشي أسجل في الرابطة..
وقمة الكرة كانت في مدني مكونة من الاتحاد والأهلي والنيل والرابطة ولكن الكأسات
كانت محصورة دائماً بين الأهلي والاتحاد.- أول مباراة تحدي -: يضيف إبراهومة الكبير
قائلاً: بعد فترة طويلة من جلوسي في كنبة الاحتياطي قاموا لعبوني في مباراة الاتحاد
ضد النيل وكانوا ملعببيني تحدي للنيل لأني كنت أصغر لاعب في الفريق وكانوا (خاتيني)
قصاد سيد سليم الذي كان يلعب للنيل.. فهو لاعب حريف جداً وبيلعب في الوسط وناس
النيل كانوا بيلعبوه كتحدي للأندية وهو لاعب صغير عشان كده ناس الاتحاد قالوا كمان
نخت ليهم إبراهومة... وأنا وسيد سليم طريقة لعبنا واحدة وبنشبه بعض.. ومن مباراة
النيل ديك تأني ما غبت من تشكيلة الاتحاد لحدي ما مشيت منو..- كرار وضيف الله -:
تعلمت كثيراً من مصطفي كرار الذي دربني في الاتحاد بجانب هاشم ضيف الله والاثنان
معاً أعتبرهما من أعظم المدربين في تلك الفترة.
- الإداريين كانوا مفتشين :
يقول إبراهومة: الإداريين زمان ما زي الإداريين اليوم... (ديلك كانوا بمشوا
بفتشو الحواري والميادين في الأحياء عشان يكتشفوا النجوم واللاعبين الموهبون
ويسجلوهم في الأندية واليوم ما فياإداري بفتش للمواهب ولا بمشوا الميادين يشوفو
!!.- الانتقال للمريخ - : يقول إبراهومة... جاء المريخ لمدينة ودمدني لملاقاة
الاتحاد فلعبنا أمامه مباراة العمر وفزنا عليه بهدف وقد سطع نجمي في هذه المباراة
وعقب المباراة تكلم معاي ابوالعائلة وقال لي تجي تلعب معانا في المريخ وقال لي نحن
كلمنا عزت ابوالعلا رئيس النادي عشان تجي تلعب في المريخ ولازم تجينا في الخرطوم
هناك عشان الموضوع ده ينتهي في سرية وما زول يعرفوا.مجموعة قوية في المريخفي تلك
الفترة كان المريخ يضم مجموعة قوية من اللاعبين بقيادة ابوالعائلة وسري ومنصور
رمضان وقرعم وطلب مدني وخوجلي ابوالجاز وديل طبعا لاعبين كبار والعائلة كان اقدم
لاعب في الفريق وهو الكابتن والمتحدث باسم اللاعبين ويقوم بمهام ادارية ايضاً وكان
الكل في الكل.
ومشيت الخرطوم:
يواصل ابراهومة ويقول مشيت الخرطوم وقابلت ناس المريخ واتفقوا معاي علي التسجيل
في المريخ مقابل 150 جنيه في عام 1957م وكانت كثيرة جدا في تلك الفترة.
ناس الاتحاد زعلو:
بعد ما سجلت في المريخ قاموا ناس الاتحاد زعلوا مني وكانوا دايريني ارجع العب
في الاتحاد لكن طبعا انا مريخابي وما اشتغلت بي الحاحهم.
حرشوا لي ابوي:
ناس الاتحاد مدني كانوا زعلانين جدا من قصة توقيعي في المريخ دي ودايرني باي
طريقة ارجع العب في الاتحاد وقاموا رسلوا لي ابوي في الخرطوم وقالوا ليه لازم تسافر
تجيب الولد ده يلعب هنا وناس الخرطوم ديل بعلموه ليك الصعلكة والود ده حا يضيع هناك
وفعلاً ابوي جا النادي وقابل ناس المريخ وقال لي الناس ديل قالوا انت لازم ترجع
مدني اخير ليك من الخرطوم ولكن قلت ليه خلاص انت قول ليهم الزول ده جاي في الايام
الجاية دي .
كنت معجب ببرعي القانون:
يواصل ابراهومة حديثة ويقول انا طبعاً مريخابي وبحب المريخ جدا ومعجب باللاعب
برعي احمد البشير القانون لدرجة انني كنت اضع صورته امامي واتفرج فيها بالساعات
ولما جيت المريخ اعتبرت ان طموحي بدأ يتحقق لذلك لم افكر اصلاً في العودة للاتحاد.
بهاء الدين بحيري حاول معاي:
كان هناك محاولات ايضاً من قبل بهاء الدين بحيري .. وناس الاتحاد اصلاً ما
يئسوا مني وكانوا مفتكرين انو حيأثر علي باعتبار صلة القرابة بيني وبينه بالاضافة
لانه من سجلني بالاتحاد ولكن محاولاته فشلت فبقيت بالمريخ .
دفعتي في المريخ:
يواصل ابراهومة حديثه للصحافة ويقول انا دفعتي في المريخ ناس ماماو وماجد ودقنو
وعبدالله ووزه وبكري التقر وجقدول والعمدة وحراس المرمي كانوا تلاتة هم حمد خاطر
ورفعت وهاشم .
اساسي من اول مرة:
يقول ابراهومة عندما تم تسجيلي للمريخ كانت هنالك مباراة هلال مريخ علي الابواب
وقالوا يدوني فرصة عشان يشوفوني لعبوني تاني ما دخلت من التشكيلة .
اول هدف في سبت دودو:
كان الهلال في تلك الفترة يضم العمالقة سبت دودو وامين زكي وصديق منزول وحسن
عطية والهادي صيام وودالديم ودريسة وابراهيم يحيي وعدد آخر من النجوم لا تسعفني
الذاكرة من ذكر اسمائهم.
الجماعة زاغو:
يواصل ابراهومة حديثه ويقول ابداً ما خفت من المباراة ولا الجمهور خاصة وهي
الاولي لي وضد الهلال لانني كنت اثق في مقدراتي الفنية هذا غير انني لعبت في مدني
امام جمهور لا يقل اهتماماً عن جمهور الخرطوم وكانت المباراة بالنسبة لي اكثر من
عادية لأن الندية في تلك الفترة كانت قائمة وقوية بين كرة الخرطوم وكرة مدني.
المهم في الأمر أن الحكم احتسب ركلة جزاء لصالحنا ولاعبي المريخ كلهم يتهيبون يسار
حارس الهلال العملاق الملقب بالصقر الاسود سبت دودو والذي كان من المستحيل ان تحرز
في مرماه ضربة جزاء ودائماً ما كان سبت يحرج اميز اللاعبين ويصد ركلاتهم من ضربة
الجزاء .. ولما صفر الحكم جماعتي في المريخ كلهم زاغوا طوالي قمت انا مشيت علي
الكورة ووضعتها في علامة الجزاء فاندهش الجميع وقالوا الشافع دا شنو الداير يشوت
البلنتي في سبت دا وبالفعل ميلت بجسمي علي الناحية اليمني لسبت دودو فمال معي وبكل
خفة وضعت الكرة في يساره هدفاً .
دهشة من سبت دودو:
بعد ان احرزت الهدف اندهش سبت دودو وقال لي تلعبها لي في الحتة البخافوا منها
اللاعبين .. وتمتم سبت قائلاً بعد ان ادار ظهره مني يا ربي دا شنو دا ..
انا كنت بتمرن كتير.
يواصل ابراهومة حديثه ويقول طبعاً انا كنت بتمرن علي تسديد ركلات الجزاء كتير
جدا وتماريني دي ادتني ثقة ودفعة معنوية كبيرة ومن اليوم داك أي بلنتي كانوا بقولو
ابراهومة هو البيشوت .
عشرة جنيه حافز:
بعد ما انتهت المباراة بفوزنا بهدفين علي الهلال تسلمت اول حافز من المريخ
عبارة عن مبلغ عشرة جنيهات وكانت كتيرة طبعاً ومن الطرائف بتاعة الحوافز في المريخ
مرة الحاج شاخور ادي جاد الله مبلغ عشرة جنيه كحافز له فقال له جاد الله دي افكها
يا ريس ؟! فقام شاخور ضحك وقال لجاد الله لا لا يا اخوي شيلها كلو كلو.
أول مباراة ضد فريق اجنبي:
يواصل الكابتن ابراهومة حديثه للصحافة ويقول : اول مباراة لعبتها كانت مع منتخب
الجزيرة ضد الهونفيد المجري الذي كان يضم وقتها بوشكاش وبوجيك وهذا الثنائي كان من
اشهر
نجوم كرة القدم في العالم .. خسرنا منه بالتسعة ولكني استفدت من هذه المباراة .
قوني في سبت وداني للفريق الاهلي:
يعود ابراهومة للحديث عن هدفه في مرمي العملاق سبت دودو ويقول بعد ان احرزت
هدفاً في شباك الهلال تابع المدرب البلغاري كوستيف ادائي في المباراة وبعد ان انتهت
مباشرة اعلن ضمي للفريق الاهلي السوداني وهو المنتخب الوطني الاول الذي كان يتأهب
للمشاركة في بطولة افريقيا .
والمنتخب الوطني في تلك الفترة كان يضم نجوم مميزين يتم اكتشافهم بالمتابعة الدائمة
فمثلاً من الابيض كان يلعب لهذا المنتخب اولاد جادين التلاتة ومن بورتسودان عبدالله
اوهاج بالاضافة لبرجل من عطبرة ولاعبي الموردة عمر عثمان وود الزبير والمحينة
وكباكا وختم ادريس ومحجوب الله جابو وعدد مميز من نجوم مدني الكبار .
اول ظهور مع المنتخب الوطني:
يضيف ابراهومة قائلاً: اول ظهور لي مع المنتخب كان امام كينيا في نيروبي وفزنا
عليها بهدف في اللقاء الاول وبثلاثة اهداف في اللقاء الثاني بالخرطوم .
قصة غريبة في غانا:
يقول الكابتن ابراهومة انه واصل مسيرته مع المنتخب الوطني عقب لقاء كينيا
وذهبنا الي غانا للمشاركة في النهائيات .. تفوقنا علي المنتخب التونسي وتأهلنا
لملاقاة غانا .
عقب عزف السلامين الجمهوريين نزل الي ارض الملعب شخص غاني يرتدي ملابس غريبة ويتمتم
بكلمات غير مفهومة اندهشنا جميعاً لهذا الشخص واعتبرناه مشعوذاً .. حمل في يديه
كرتان ووضعهما في دائرة السنتر ذهب للمرمي الخالي وسدد كرة واحدة داخل الشباك ثم
عاد واخذ الثانية وسددها في نفس الزاوية التي سدد بها الكرة الاولي وعندما بدأت
المباراة خسرنا بهدفين في نفس المرمي وفي نفس الزاوية التي سدد فيها المشعوذ الكرة
وكان حارس مرمي السودان هو العملاق سبت دودو ... فخرجنا بين حزن ودهشة واذكر ان هذه
الخسارة سببت لنا ازعاجاً دائماً لدرجة ان الانتقادات كانت تلاحقنا في كل مكان وكان
رئيس اتحاد الكرة في تلك الفترة عبدالرحيم شداد .
المهم تناسينا الهزيمة بصعوبة وعادت الامور تسير في التنافس المحلي.
افتخر بتاريخي واندهش لابني:
يقول الكابتن ابراهومة انه وطيلة مسيرته الرياضية كلاعب لم ينل اية بطاقة صفراء
أو حمراء من الحكام الي ان ترك لعب الكرة .. ولكنه قال انه مندهش لابنه مصطفي الذي
يلعب بنادي الامل مدني درجة ثانية وهو يتابع مستواه باستمرار واضاف سالته عبر
الهاتف من قطر (اها يا ولد ماشي كيف مع القراية والكورة فقال لي والله اليومين ديل
قراية بس قلت ليه مالك واقف من الكورة فقال لي انا ماخد كرت احمر عشان كده موقوف
لمباراتين فاستغربت وقلت له يا اخ اصلوا ما معقول انا لاعب بعمرك ده كرت واحد ما
اخدتو البخليك تاخد كرت احمر شنو؟
في الحلقة القادمة
ابوالعائلة وقفني مدى الحياة .
ابيت ما العب لي ماجد عشان كده اتغلبنا بقون جكسا.
منذ ان غادرت كشوفات المريخ لم ادخل ناديه حتي الآن.
مشكلة الكرة السودانية في اللاعبين ومافي لاعب بستحق الملايين والمحترفين ما منهم
اي فايدة.
ابراهومة لقب مقفول للمريخ وهذا سره!!
لعبت للمنتخب القطري ودربت اغلب اندية قطر
بالاضافة إلى مفاجآت وطرائف في حياة ابراهومة
|
