|
لو كنت رئيس
كنا زمان .. ياما كنا
لا حزناً يقدر يسكـُـنّا
لا دمعة بتعرف مسكنّـا
*************
ما كان الليل... الآم وعذاب
لا جروح بتصيبك من أحباب
لا الطعنة تجيك من الأصحاب
**************
الدنيا أمان وسلام كانت
وأغاني سرور بيها ازدانت
وأقمار ابروف وشموس بانت
*************
ما كان الهم همّ اللقمة
ولا كانت وقف على الطُـغمة
لا الفرقة بتنخر في الأُمـة
*************
اجتاحت أيامنا الغُـمة
ومريضك مات من الزُكمة ..
مقهور من ناس.. كانَ ..وثُـمَّ
*************
لو كنت رئيس كنت نزلتَ
للناس في الشارع واخترتَ
أشراف الناس غُـبش الجتةَ
***************
البقدرو يشعُـرو بي خوفنا
والجوع القرقر في جوفنا
والمرض الراقد في لِحُوفنا
*************
لو كنت رئيس ما كان نُمتَ
ولا سُـقت حرس لمّـن حُـمتَ
بالليل صليت وصباح صُـمتّ
************
الهم تكليف يالماشي نضيف
لو زول إتعتّـر جمب القيف
أو مركب غرقت شايلة رغيف
أنت المسئول يا اكبر زول
يالشلت أمانة جبال بتزول
من حملها وأنت حملتها حول
قد كنا زمان نلعب في الطين
لو جانا (البُرجُم ) بشفي الطين
والأم تتوحّـم تاكل الطين
والبيت بترمّـم ساندو الطين
وقهرنا ( اليانكي ) عشان الطين
والله سوانا تمام من طين
من طين الطين .. سودانـيـيـن
الله الله ..........سودانيـيـن
|
