يكفيك يا نار الحروب
الموقدة في تالا الجنوب
يكفيك ما جاك من حطب
يكفينا منك مر خطوب
الناس دوام ليه ما بتتوب
من الحرب ولا الضرب

يوم هللوا الناس للحرب
شيخنا قال: (الحرب طبعاً
فرض عين...ما فيش كلام)
يا أيها الشعب الهمام
فلنقتل الكفرة اللئام
أصلاًََ نجوس أولاد حرام

ويوم وقعوا الناس السلام
شفناه نفس الشيخ قام
بي عاصاتو في قفطانه داك
بي شاله متقيف تمام
قال: (الحرب كانت حرام)

وبعض الخلوق مستغربين
في الشيخ يوم بدت الحرب
يرغي ويزبد في الكلام
والليلة بي كل احترام
شيخنا يجنح للسلام

يوم الكتل سواهو عيد
فَرَحنا بي موت الشباب
غنينا في الحزن الشديد
زغردنا لي عرس الشهيد
وعرضنا زين
هزينا بي فرع الجريد
والليلة قالوا كلام جديد

ناس السياسة أولاد حرام
خدعوك بي حيلة كلام
حفظ الأرض...صون العرض
والجنة بي الطول والعرض
ودوك لي الموت الزؤام

صفا انتباه... دور للأمام
كلوا انضباط ياخدوا التمام

بعد الهتافات والغنى
وفورة الحماس
ونبرة الخطب المدبجة
بالطباق وبالجناس

والعرضة في ضل السيوف
دق الطبول نقرالنحاس
شمينا ريحة الدم خلاص
ودخلنا في وسط الدواس
شيخنا قال: شر للأمام
ما تخشى شيء
كل الوراك مؤمنة

و ما لقيت هناك
كل الكلام القالوه داك
لا الغابة بتكبر معاك
لا الأرض بتبارك خطاك
الدار دمار والناس سِواك
من غير حرب
في حالة أقرب للهلاك









 

الطيب الشيخ