مالك براك ؟؟؟

مسيكن نوايب الدنيا ما خلت نجيم يشلع سماك

مسكين تشيل الم الخلوق والمك مقطع فى حشاك

يا انت هاك

شمعات يضون فى طريقك

ونور بسيمة يكون دواك

قلبى معاك

ايدى ادياتك وصوتى مع البلابل زيى لحون

وقصص  تودى ضجر مساك

اكتب اليى عن الظروف ورينى كيف الحال هناك

وانظر وراك

ايد الغدر

كى لا يجيك شى من وراك

راحل براك

كل الطيور رحلت جموع

الاك وحيد

زيى زول مطوق بى شباك

شجنك محاوطك ومنتشر بان  فى عينيك لى منتهاك

وفى ناس ايديات  ناس ضهر  وفى ناس  مصارين

ما عداك

مسكين بتزفر ومنكسر ميرود

ومين عارف شقاك؟؟؟؟؟؟؟؟

يا انت من اول صباك

محتار  وتايه   فى جمر

شقيش تمش المك جواك

مسكين براك

مسكين براك

فكر براك كيف تستمر

عاين حواليك ووراك

عاين هنا وعاين هناك

الدنيا مطمورة الصبر

كم كاس صبر ربك سقاك؟؟

مسكين براك

فى دربك اب وجعا كتر

واقف ومتوحد براك

وياها المسافة سنين عمر

احسب وشوف بايديك ماك

قارى وبتفهم فى الحساب وتفلسف القول والشعر

ومرات كتابك زيى دواك

فى فرقة لا يوم لاشهر

متل التقول زمنك شقاك

ساسقت فارس ومنتصر

لكن وحيد مسكين براك

ربك معاك ...........................

انتصار محمد الحاج